“Fəthiyəspor”a yollandığı deyilən həmyerlimiz: “Türkiyəyə istirahət üçün gəlmişəm” ÖZƏL

“Hazırda Türkiyədəyəm. Bəli, Fethiyedə olduğum doğrudur. Burada hətta Davud Kərimi ilə də görüşdüm. Amma buraya sırf istirahət üçün gəlmişəm. “Fethiyespor”da məşq etdiyim, bu komandaya keçəcəyim haqda deyilənlər yalandır. Bir daha təkrar edirəm ki, bura yalnız istirahət üçün gəlmişəm”. Futbolxeber.az saytına verdiyi açıqlamada bu sözləri Nurlan Novruzov deyib.

Müqavilə ilə “Bakı”ya məxsus olan, “Sumqayıt”la icarə müddəti başa çatan N.Novruzov hələlik gələcək karyerasına aydınlıq gəlmədiyini bildirib: “Türkiyəyə səfərim hələ əvvəldən planlaşdırılmışdı. Dostumla birgə bura gəlmişəm. Gələcəyimlə bağlı hələlik dəqiq heç nə yoxdur. Nə “Sumqayıt”da qalacağımı, nə də “Bakı”ya geri qayıdacağımı bilmirəm. Bütün suallara mən vətənə qayıtdıqdan sonra aydınlıq gələcək. Yeni ilə kimi Bakıda olacağam”.