Orxan Məmmədov: “Dünya çempionatında üçlüyə düşmək uğur sayılacaq”

“Dünya çempionatına hazırlıqlar artıq son mərhələdədir. Əlamətdar haldır ki, bu gün şəhərimizin sakinləri və qonaqları üçün Dənizkənarı Parkda “Fan Zona” açıldı. İnsanlar asudə vaxtlarını burada keçirə bilərlər. Bu, dünya çempionatına marağı daha da artıracaq”.

Futbolxeber.az saytının məlumatına görə, bu sözləri Azərbaycan Minifutbol Federasiyasının prezidenti Orxan Məmmədov Bakıda keçiriləcək minifutbol üzrə dünya çempionatı ilə bağlı “Fan Zona”nın açılışında deyib.

O qeyd edib ki, dünya çempionatının oyunlarını qəbul edəcək Milli Gimnastika Arenasında işlər tamamlanmaq üzrədir: “Artıq son işlər gedir. Arena qarşıdakı günlərdə tam hazır olacaq. Bildiyiniz kimi, mayın 19-da arenada veteranlar arasında çox maraqlı yoldaşlıq matçı keçiriləcək. Azarkeşlər, futbol ictimaiyyəti həmin matçı maraqla gözləyirlər”.

“Fan Zona”nı gəzən O.Məmmədov gənclərlə play-station da oynayıb: “Play-stationda “Barselona”nı seçməyim təsadüfi idi. Dünya futbolunda “Mançester Yunayted”ə azarkeşlik edirəm. “Fan Zona”nı şəhid övladları və ailələrinin ziyarət etməsi çox xoşdur. İnanıram ki, uşaqlar, gənclər burada istədikləri kimi əylənəcəklər, vaxtlarını xoş keçirəcəklər. Mən də imkan tapdıqca bura baş çəkəcəm. Dünya çempionatının bütün oyunları “Fan Zona”da da, böyük monitorda nümayiş etdiriləcək”.

Federasiya rəhbəri minifutbol millimizin mundiala hazırlığı barədə də danışıb: “Komanda məşqlərini davam etdirir. Bildiyiniz kimi, buna qədər yığmamız Monteneqroda beynəlxalq turnirdə qalib, Slovakiyada isə finalçı oldu. Futbolçular da hazırlıqları tamamlamaq üzrədirlər. Çempionat öncəsi BƏƏ millisi ilə yoxlama görüşü nəzərdə tutulub. İnanıram ki, komandamız mayın 21-də Bəhreynə qarşı görüşə qədər tam hazır olacaq”.

O.Məmmədov komandanın hədəfləri barədə isə bunları deyib: “Dünya çempionatının Bakıda keçiriləcəyini nəzər alsaq, azarkeşlər də, rəhbərlik də millimizin qalib olmasını istəyir. Məqsəd çempionluqdur. Amma bu, dünya çempionatıdır, rəqabət güclüdür. Yarışa iddialı komandalar qatılır. Ona görə də hesab edirəm ki, üçlüyə düşmək uğur sayılacaq”.

Milli üçün pul mükafatının ayrılması barədə sualı isə o, belə cavablandırıb: “Bəli, komanda üçün pul mükafatı nəzərdə tutulub”.

Fərəc Aslanov