AFFA-dan "Sumqayıt"ın iki futbolçusuna sərt cəza

AFFA Azərbaycan Premyer Liqasının XXXIV turunda keçirilən "Kəpəz" - "Sumqayıt" oyunu ilə bağlı cəzaları açıqlayıb.

Futbolxeber.az saytının məlumatına görə, bu barədə qurumun bu gün keçirilən İntizam Komitəsinin iclasında qərar qəbul olunub.

Sözügedən görüşün 89-cu dəqiqəsində “Sumqayıt”dan Rəşad Əzizli və Vüqar Mustafayev təcavüzkar davranışa görə birbaşa qırmızı vərəqə aldıqları üçün ikisi şərti olmaqla 4 oyunluq cəzalandırılıblar. Bununla yanaşı, həm Sumqayıt təmsilçisi 3000 manat cərimələnib. Hər iki oyunçuya 3 ay sınaq müddəti təyin edilib.

Bundan əlavə, “Kəpəz” 6 futbolçusunun sarı vərəqə almasına görə 700 manat, azarkeşləri tərəfindən rəqib komandanın ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 4-cü dəfə təkrarlandığına görə 1000 manat ziyana düşüb. Oyun bitdikdən sonra azarkeşləri tərəfindən pirotexniki vasitədən istifadə edildiyinə görə isə Gəncə klubu əlavə 1500 manat da ödəməli olacaq.