“Mingəçevir”in hücumçusu: “Komandada söz-söhbətlər olsaydı, bu nəticələri qazana bilməzdik”

“Mingəçevir”in hücumçusu Nahid Əliyevin Futbolxeber.az saytına müsahibəsi

- Bu gün I Liqanın 25-ci turu çərçivəsində “İmişli”yə qarşı keçirdiyiniz oyun qolsuz heç-heçə ilə başa çatdı. Qarşılaşmanı necə şərh edərdiniz?

- Oyun çətin keçdi. “İmişli” çox güclü rəqibdir. Artıq Premyer Liqaya vəsiqəni də təmin ediblər. Bu matçda bizim üçün 1 xal da pis nəticə deyil. Rəqibin gücünü nəzərə alsaq, əsas uduzmamaq idi. Azarkeşlərimiz önündə oynayırdıq və istəmirdik ki, onları məyus edək. Məncə, “İmişli” kimi rəqiblə matçda heç-heçə yaxşı nəticədir.

- Mövsümün ikinci yarısı “Mingəçevir” uğurlu çıxışla yadda qalır. Bunu nə ilə əlaqələndirmək olar?

- İlk növbədə başda Füzuli müəllim olmaqla məşqçilər korpusunun işi burada görünür. Qışda edilən dəyişikliklərin “Mingəçevir”ə çox xeyri dəydi. Bütün bunlar da nəticələrdə özünü göstərir.

- Baş məşqçi Füzuli Məmmədovun rolunu qeyd etdiniz. Komanda yaxşı nəticələr qazansa da, mətbuatda mütəxəssislə bağlı neqativ xəbərlər yayılır. futbolçuların baş məşqçidən narazı olduğu deyilir. Bunlar nə dərəcədə doğrudur?

- O cür xəbərlər boş söhbətdir. Özünüz də qazandığımız xalları, sərgilədiyimiz oyunu görürsünüz. Komandada söz-söhbətlər olsaydı, bu nəticələri qazana bilməzdik. 10-cu yerdən 5-ci pilləyə qalxmışıqsa, deməli, Füzuli müəllim öz işini yüksək səviyyədə görür.

- Qışda “Turan Tovuz”dan “Mingəçevir”ə qoşuldunuz. Keçid icarə əsasında baş tutmuşdu, yoxsa Tovuz klubundan birdəfəlik ayrıldınız? Son turlar ardıcıl qollar vurduğunuzu nəzərə alsaq, sizi yeni mövsümdə də “Mingəçevir”də görə biləcəyik?

- Qışda “Turan Tovuz”dan birdəfəlik ayrıldım və “Mingəçevir”lə 5 aylıq müqavilə imzaladım. Mövsümün sonunda sözləşməm bitir. İndidən yeni mövsümlə bağlı nəsə deməkdə çətinlik çəkirəm.

- Sankt-Peterburq futbolunun yetirməsisiniz. Gələcəkdə yenidən Rusiyaya qayıtmaq, yaxud başqa ölkəyə yollanmaq barədə düşünürsünüzmü?

- Allahın köməkliyi ilə təki hər şey yaxşı olsun. Mənim arzum həmişə Azərbaycanı yüksək səviyyədə təmsil etmək olub. İstər Rusiyada oynayanda, istər aşağı yaş qrupu üzrə milli komandaya dəvət alanda. Gələcəkdə də Rusiyada, yaxud başqa yerdə oynasam, azərbaycanlı kimi həmişə ölkəmin adını uca tutmağa çalışmışam. Bundan sonra harada olacağımı isə zaman göstərəcək.

TAĞI