Momo Yansane: “Kəpəz”ə mütləq qalib gəlməliyik”

Qarabağ”a qarşı pis oynamadıq. Rəqibin gücü məlumdur. Artıq çempionluğu da təmin ediblər”.

Futbolxeber.az saytına müsahibəsində bu sözləri “Sumqayıt”ın hücumçusu Momo Yansane Azərbaycan Premyer Liqasının 33-cü turunda “Qarabağ”a 0:2 hesabı ilə uduzduqları oyun barədə danışarkən deyib.

Qvineyalı hücumçu son turlar uğursuz çıxış etmələrinə belə münasibət bildirib: “Əslində, heç də pis oynamırıq. Düzdür, son matçlarda qələbə qazana bilməmişik. Bununla belə, oyun baxımından ciddi problemimiz yoxdur. Bəzən bəxtimiz gətirmir, bəzən yaxaladığımız şansları dəyərləndirə bilmirik”.

O, növbəti turda “Kəpəz”ə qarşı keçirəcəkləri matçdan da söz açıb: “Mövsümün sonuna 3 tur qalıb. Toparlanıb bu matçlarda yaxşı nəticələr qazanmalıyıq. “Kəpəz”lə səfərdə üz-üzə gələcəyik. Çətin oyun olacaq. Bununla belə, hədəfimiz 3 xaldır. “Kəpəz”ə mütləq qalib gəlməliyik”.

M.Yansane növbəti mövsümdə “Sumqayıt”da qalıb-qalmayacağı barədə sualı belə cavablandırıb: “Müqavilədə +1 il bəndi var. Buna görə də klub rəhbərliyi ilə aramızda danışıqlar olacaq. Mən “Sumqayıt”da qalmaq istəyirəm. Burada hər şey məni qane edir. Azərbaycanda özümü çox yaxşı hiss edirəm. Ona görə klubumu dəyişmək barədə düşünmürəm. Lakin danışıqların necə yekunlaşacağını birlikdə görəcəyik. Hazıra menecerim bu işlərlə məşğuldur. “Sumqayıt”ı klub olaraq da, şəhər olaraq da bəyənirəm. Durumumdan məmnunam”.

Fərəc Aslanov