Qara Qarayev: “350-də dayanmaq fikrim yoxdur”

“Sabah”la oyunda Azərbaycan çempionatda 350-ci matçına çıxan “Araz-Naxçıvan”ın yarımmüdafiəçisi Qara Qarayev təəssüratlarını bölüşüb.

Futbolxeber.az saytının məlumatına görə, klubun mətbuat xidmətinə açıqlamasında təcrübəli yarımmüdafiəçi Azərbaycan çempionatlarında 350 oyun keçirməyində zəhməti olan hər kəsə təşəkkür edib: “Bu rəqəmə çatmaq üçün çox əziyyət çəkmişəm. Bunun üçün həm sağlam xarakterə, düşüncəyə, həm də nizam-intizama sahib olmalı, fiziki durumu qorumalısan. Şükürlər olsun ki, bunları qoruyub saxlamışam”.

Q.Qarayev qeyd edib ki, bununla kifayətlənmək fikrində deyil: “350-də dayanmaq fikrim yoxdur. Hədəfim fiziki gücüm imkan verdiyi qədər daha çox oyun keçirməkdir. İlk oyunumdan bu günə qədər bütün görüşlərim əhəmiyyətlidir, hər birinin özünəməxsus yeri, uğuru, xatirəsi var. Dəyərini dərk edirəm. Karyeramın bundan sonrakı hissəsində də keçirəcəyim oyunlara eyni dəyəri, keyfiyyəti qatmağa çalışacağam. Azərbaycan futboluna layiq olmağa çalışmışam, bundan sonra da belə olacaq”.