Yunis Hüseynov: “Axıra qədər Kurban Berdiyevə köməklik edəcəyəm”

“Qələbə qazanmaq istəyirdik. 3-cü pilləyə qalxmaq üçün bu gün bizə çox vacib 3 xal lazım idi. Əfsuslar olsun ki, qalib gələ bilmədik. Hesabda önə keçəndən tez bir zaman sonra qapımızda qol gördük. Ötən turda da, bu gün də rəqib yox, özümüz rəqibə şanslar yaratdıq və qol buraxdıq. Qarşıdakı oyunlara tam ciddi hazırlaşmaq lazımdır. Bu gün komandadan o qədər də razı qalmadıq”.

Futbolxeber.az saytının məlumatına görə, bu sözləri “Turan Tovuz”un məşqçisi Yunis Hüseynov Azərbaycan Premyer Liqasının 32-ci turunda “Şamaxı” ilə heç-heçə etdikləri (1:1) oyundan sonra deyib.

Daha sonra o, jurnalistlərin suallarını cavablandırıb:

- Komanda "Sabah"a, "Qarabağ"a qalib gəlir, amma nisbətən zəif rəqiblərlə oyunlarda xal itirir. Bunun səbəbi nədir?

- Biz özümüz də bu haqda danışırıq. Dediyiniz rəqiblərlə oyunlarda xallar itirməsəydik, bəlkə də 2-ci yerdə olardıq. Mən özüm də futbol oynamışam. "Qarabağ"a, "Sabah"a qarşı futbolçularda köklənmə başqa cür olur. Dəfələrlə təkrarlayırıq ki, tam ciddi olmaq lazımdır. Bunun üzərində işləyirik. Hər oyundan sonra Kurban Berdiyev də futbolçularla danışır.

- "Karvan"ın demək olar ki, bütün uğurları sizin adınızla bağlıdır. Yevlax təmsilçisi bu gün Premyer Liqaya vəsiqəni təmin etdi. Təklif olsa, yenidən "Karvan"da işləmək istəyərsiniz?

- Premyer Liqaya yüksələn bütün komandalara uğurlar arzulayıram. Bölgə klublarının elitada olması yaxşı haldır. Amma mən hazırda "Turan Tovuz"da özümü xoşbəxt hiss edirəm. Axıra qədər Kurban Berdiyevə köməklik edəcəyəm.

- Komanda niyə hücumda çoxala bilmirdi?

- Axsayan cəhətimiz odur ki, hücumda çoxala bilmirik. Bu olmayanda da qol vura bilməyəcəksən. Hücuma atılmaq lazımdır. Öndə top saxlamaqda çətinlik çəkirik. Arxada top saxlamaq asandır. Çünki orada rəqibin oyunçuları az olur. Qol vurmaqda da çətinliklərimiz var. Amma çox asanlıqla qol buraxırıq.

- Avrokuboklara vəsiqə üçün kubokun finalında "Qarabağ"ın qələbəsini gözləyəcəksiniz?

- Hələ qarşıda 4 oyun var. Bilmək olmaz nələr baş verəcək. Fikrimiz ancaq 3-cü yer üçün oynamaqdır. Kubokun finalını gözləmək istəmirik. Avrokuboklarda iştirak etməyi arzulayırıq. "Turan Tovuz" azarkeşləri möhtəşəmdir. Klubun rəhbəri də komanda üçün hər cür şərait yaradıb. İnanıram ki, avrokuboklara vəsiqə qazanacağıq.