Məqsəd İsayev: “Qələbə qismət deyilmiş”

“Zirə”nin müdafiəçisi Məqsəd İsayevin Futbolxeber.az saytına müsahibəsi

- Azərbaycan Premyer Liqasının XXIX turunda “Qarabağ”a 0:1 hesabı ilə uduzdunuz. Liderdən alınan məğlubiyyəti necə şərh edərdiniz?

- Son dəqiqədə penaltini qaçırdıq. Buna görə çox təəssüflənirik. Halbuki xal qazana bilərdik. Oyun ərzində çoxlu hücumlar edirdik. Lakin heç cür rəqib qapısına yol tapa bilmədik. Qələbə qismət deyilmiş.

- Qaçırılan penaltini nəzərə almasaq, fərqlənmək üçün “Zirə”də nə çatışmadı?

- Epizodlarımız oldu. Salifu fərqlənə bilərdi, eləcə də mən. Lakin alınmadı. Nə qədər çalışsaq da, hesabı bərabərləşdirə bilmədik. Artıq gələn oyunları düşünməliyik.

- Qapınızda erkən qol görməyiniz çıxışınıza nə dərəcədə təsir etdi?

- Qoldan sonra hücumlarımızı artırdıq. Dediyim kimi, şanslarımız da var idi. Yararlana bilmədik. Futbolda belə hallar olur.

- Hazırda ikinci pillədə qərarlaşmısınız. Əsas hədəf gümüş medaldır, yoxsa ilk üçlük?

- Əsas hədəfimiz ilk üçlüyə düşməkdir. Hazırda ikinci pillədə qərarlaşmışıq. Belə davam etsək, bu cür oynasaq, inşallah mövsümün sonunda ilk üçlükdə yer alacağıq.

- Yəqin razılaşarsınız ki, Avroliqaya vəsiqə əlavə üstünlükdür. Bu baxımdan kuboku “Qarabağ”ın qazanmasını arzulayırsınızmı?

- Təbii ki, ikinci yer olsaq, bu, üstünlükdür. Belədə “Qarabağ”ın kuboku qazanması bizim xeyrimizə olacaq. Çünki Avroliqada çıxış edərkən, uduzsan belə, mübarizəni Konfrans Liqasında davam etdirmək şansın olur. Əsas odur avrokuboklara gedək və ölkəmizi layiqincə təmsil edək. Çox istərdik ki, avrokuboklarda ötənilki nəticəmizi daha da yaxşılaşdıraq.

- Növbəti turda “Neftçi” ilə üz-üzə gələcəksiniz. Həmin matçdan gözləntiləriniz nədir?

- “Neftçi” çox yaxşı komandadır. Buna baxmayaraq, qələbə qazanmaq üçün əlimizdən gələni edəcəyik. Bizə xal lazımdır. Hətta deyərdim ki, “Neftçi”ni məğlub edə bilsək, avrokuboklara vəsiqə tapşırığının öhdəsindən 70 faiz gəlmiş olacağıq.

Fərəc Aslanov