Kadi: “Həftə boyu məşqlərdə cərimə zərbələrinin üzərində çalışmışdım”

“Qarabağ”ın yarımmüdafiəçisi Kadi Borgesin Futbolxeber.az saytına müsahibəsi

- Azərbaycan Premyer Liqasının XXIX turunda “Zirə” üzərində minimal hesablı qələbə qazandınız. Görüşlə bağlı nə deyə bilərsiniz?

- Yaxşı oyun oldu. Turnir cədvəlində ilk iki pillədə qərarlaşan klublar qarşılaşırdı. Matçın çətin keçəcəyi əvvəldən məlum idi. Meydanda tez-tez birə-bir mübarizələrə şahidlik edirdik. Çətin də olsa, qələbə qazandıq və yolumuza davam edirik.

- Qeyd etdiyiniz kimi, turnir cədvəlində ilk iki pillədə qərarlaşan komandalar qarşılaşırdı. Liderlərin oyununa layiq matç alındığını söyləmək mümkündür?

- Məncə, hə. Çünki hər iki tərəf qələbə qazanmaq istəyirdi. Güzəştsiz mübarizə gedirdi. Maraqlı oyun alındığını düşünürəm.

- Baxımlı qola imza atdınız...

- Cərimə zərbələrinin üzərində daim işləyirəm. Həftə boyu məşqlərdə bunun üzərində çalışmışdım. Şadam ki, gözəl qolla komandama qələbə qazandırdım.

- Artıq növbəti 2 turda qələbə qazanmaqla “Qarabağ” növbəti çempionluğunu rəsmiləşdirə bilər. 31-ci turda qızıl medalları təmin etmək mümkün olacaq?

- Biz bu barədə düşünmürük. Qarşımıza hədəf qoyulmayıb ki, hansı turda çempionluğu təmin edək. Məqsədimiz qızıl medalları qazanmaqdır və bunun üçün də çalışırıq.

- Növbəti turda autsayder “Səbail”lə qarşılaşacaqsınız. Həmin matçdan gözləntiləriniz nədir?

- Rəqiblərə belə yanaşmamalıyıq. Nə olsun ki, “Səbail” turnir cədvəlində aşağı pillədə qərarlaşıb. Buna qədər turnir cədvəlində aşağı pillədə qərarlaşanlar xeyli sürprizə imza atıblar. Ona görə də qətiyyən arxayınlaşmaq, hansısa rəqibə zəif gözü ilə baxmaq olmaz.

- Kubokun yarımfinalında ilk matçda “Araz-Naxçıvan”a uduzdunuz. Cavab görüşündə bu məğlubiyyətin əvəzini çıxmaq nə dərəcədə mümkündür?

- İnanıram ki, bunu bacaracağıq. İlk görüşdə uduzduq. Lakin hələ heç nə bitməyib. Sona qədər mübarizəmizi davam etdirəcəyik. Məqsədimiz hər iki cəbhədə uğur qazanmaqdır.

Fərəc Aslanov