Yunisoğlu: “O, pulsuzluğa dözmədi”

Millimizin sabiq üzvü Saşa Yunisoğlu çıxış etdiyi “Dənizlispor”un baş məşqçisi Yusuf Şimşəkin istefa verməsinə münasibət bildirib. Futbolxeber.az saytına verdiyi açıqlamada S.Yunisoğlu Y.Şimşəkin maddi səbəblərdən klubu tərk etdiyini bildirib: “O, pulsuzluğa dözmədi. Rəhbərlik qarşısında şərt qoymuşdu ki, “Fethiyespor”la matça qədər futbolçuların bütun borcları verilməlidir. Həmin oyuna qədər hər şey əla gedirdi. Biz 17-ci yerdən 8-ci yerə yüksəldik. Biz futbolçular da Yusuf Şimşəkə inanırdıq və ona görə hər oyunda bütün gücümüzü meydanda qoyurduq. Amma “Fethiyespor”la oyundan öncə bəlli oldu ki, rəhbərlik sözünün üstündə durmayacaq. Artıq 5 aydı pul almırıq. Elə bu səbəbdən də “Fethiyespor”a öz meydanımızda 1:5 hesabı ilə uduzduq. Artıq futbolçular da rəhbərliyə inanmır və komandada psixoloji vəziyyə çox pisdir. Yusuf Şimşək də başa düşdü ki, artıq tək başına heç nə edə bilməyəcək. İkinci dəfə futbolçuları nəyəsə inandırmaq çox çətin idi. Bu səbəbdən də o istefa verərək, klubdan getdi”.