Emin Mahmudov ümidlidir: “Yenə “kambək” edəcəyik”

“Neftçi”nin yarımmüdafiəçisi Emin Mahmudovun Futbolxeber.az saytına müsahibəsi

- Kubokda yarımfinalın ilk matçında “Sabah”a 1:2 hesabı ilə uduzdunuz. Qarşılaşmanı necə şərh edərdiniz?

- Oyun istədiyimiz kimi alınmadı. Rəqib bizi əks-hücumda yaxşı tuturdu. Düzdür, uduzduq, lakin bu, birinci matç idi. Qarşıda hələ cavab görüşü var. Sona qədər vuruşub yenə “kambək” edəcəyik.

- İlk matçdakı zəif çıxışdan sonra “kambək” etməyiniz nə dərəcə realdır?

- Bizim bundan da pis oyunlarımız olub. İstər kubokda, istər Avroliqada. Məsələn, Kiprdə “Aris”lə oyunda 0:2 hesabı ilə uduzmuşduq. Halbuki həmin matçda rəqib 10 qol vurmalı idi. Buna baxmayaraq, ikinci görüşdə 3:0 hesablı qələbə qazandıq və mərhələ adladıq. Odur ki, hər şey mümkündür. Azarkeşlərimizə borcluyuq. Çalışacağıq bu məğlubiyyətin əvəzini çıxaq və onlara borcumuzu qaytaraq.

- Ümumiyyətlə, əsas problem nədədir? Belə görünür ki, “Neftçi” hücum planında çox axsayır...

- Hücumlar istədiyimiz kimi alınmadı. Top itkilərinə çox yol verdik. Heç cür öz oyunumuzu göstərə bilmədik. Başa düşürük ki, gedişat yaxşı deyil və bunu dəyişməliyik.

- Fikirlərinizi ümumiləşdirsək, elə çıxır ki, “Neftçi” finaldan əlini üzməyib?

- Əlbəttə. Hesab 1:2-dir. Çalışacağıq ki, vəziyyəti dəyişək və vəsiqənin taleyini xeyrimizə həll edək.

- Zədədən yeni qayıtdığınız üçün ehtiyatda idiniz və sonradan meydana çıxdınız. Cavab oyununa qədər Emin Mahmudov 100 faiz hazır olacaq?

- İnşallah hazır olacağam. Zədədən sonra komanda ilə birgə cəmi bir məşq keçmişdim, dərhal oyuna çıxdım. Buna görə çətin idi mənim üçün. İnanıram ki, cavab görüşündə daha yaxşı çıxış edəcəyəm.

- Rəqib baş məşqçi mətbuat konfransında bildirib ki, həm “Neftçi”, həm də hakimləri udduq. Sizcə, o, dediklərində nə dərəcədə haqlıdır?

- Bilmirəm o nə danışıb. Lakin yenidən oyunu izləsə, özü də görər ki, hakimlik nəsə yox idi.

- Ötən mərhələdən sonra 2 oyunluq cəzalandırılan və yarımfinalda komandaya kömək edə bilməyən Bassala Sambunun yoxluğu meydanda hiss olunurdu?

- Sambu gələndən yaxşı çıxış edir. Son turlar da fərqlənir. Əlbəttə, onun oynaması bizim üçün vacib idi. Komandaya faydası dəyərdi. Lakin mən digər hücumçularımıza da inanıram. İnşallah cavab oyununda onlar da komandaya kömək edərlər.

İbrahim Cəfərov