Ryonosuke Ohori: “Neftçi”nin məqsədi kuboku qazanmaqdır”

“Matça yaxşı başladıq. Erkən qol vurduq. Təəssüf ki, dərhal da qapımızda top buraxdıq. Qalib gəlməyi çox istəsək də, yekunda yalnız 1 xalla kifayətləndik”.

Futbolxeber.az saytına müsahibəsində bu sözləri “Neftçi”nin yarımmüdafiəçisi Ryonosuke Ohori Azərbaycan Premyer Liqasının 29-cu turunda “Araz-Naxçıvan”a qarşı keçirilən oyun barədə danışarkən deyib.

Yapon yarımmüdafiəçi 1:1-lik heç-heçəni belə şərh edib: “Bilirdik ki, əvvəlki 3 matçın heç birində “Araz-Naxçıvan”a qalib gəlməmişik. Ona görə də bu dəfə uğursuz gedişata son qoymaq istəyirdik. İkinci hissədə rəqibdən daha üstün oynadıq. Bir neçə qol epizodumuz oldu. Təəssüf ki, bəxt bizdən üz döndərdi və real epizodları qola çevirə bilmədik. Artıq qarşıdakı matçları düşünməliyik”.

24 yaşlı futbolçu bu gün ölkə kubokunun yarımfinalında “Sabah”a qarşı keçirəcəkləri matçdan da söz açıb: “Bizi gərgin oyun gözləyir. “Sabah”la matçın əhəmiyyəti çox böyükdür. Rəqibin heyətində yaxşı futbolçular var. Bununla belə, biz də öz gücümüzə inanırıq. Əlimizdən gələni edəcəyik ki, qələbə qazanaq və azarkeşlərimizi sevindirək. Fanatlarımız hər zaman bizə yaxşı dəstək olurlar. İnanıram ki, “Sabah”la matçda onların sayı daha da çox olacaq. Məhz azarkeşlərin dəstəyi ilə qalib gələcəyimizə inanıram”.

R.Ohori bildirib ki, “Neftçi”nin məqsədi kuboku qazanmaqdır: “Çempionatda turnir cədvəlində mövqeyimiz elə də ürəkaçan deyil. Yuxarı pillələrdən bir qədər aralı düşmüşük. Buna görə də avrokuboklara yollanmaq baxımından kubok bizim üçün real şansdır. Bundan faydalanmalıyıq. Məqsədimiz kuboku qazanmaqdır. Bunun üçün sona qədər vuruşacağıq. Əlimizdən gələni edəcəyik ki, əvvəlcə finala yüksələk, daha sonra isə kuboka sahib çıxaq”.

İbrahim Cəfərov