“Neftçi”, sabaha saxlama!

Sabah “Neftçi” mövsümün geridə qalan hissəsində ən vacib oyununa çıxacaq. Düzdür, kubokun yarımfinalı iki matçdan ibarətdir. Amma istənilən halda sabahkı qarşılaşma flaqman üçün həyati əhəmiyyət kəsb edir. Finala vəsiqəni Masazırda rəsmiləşdirmək üçün “ağ-qaralar” ilk oyunda mütləq sərfəli nəticə qazanmalıdırlar. Hər nə qədər Azər Salahlı “riyazi cəhətdən avrokuboklara çempionatdan da yollanmaq şansımız var” desə də, reallıq budur ki, ümid kubokadır. Ona görə də indi yalnız və yalnız sabahkı matçı düşünmək lazımdır.

“Son iki mövsümdə komanda uğursuz çıxış edir”, “Samir Abasov aqressivdir”, “Legionerlərin çoxu “Neftçi”nin səviyyəsinə uyğun deyil”, “İdarəetmə zəifdir” və s. və i.a. İndi bütün bunları kənara qoymaq, bir olmaq və uğursuz mövsümü xilas etmə zamanıdır. Heç “Əşşi, onsuz da finalda “Qarabağ”a uduzacaq” da deməyin. Birincisi, ilk növbədə finala çıxmaq lazımdır, ikincisi, hələ finaldakı rəqibin “Qarabağ” olacağı dəqiq deyil. Elmar Baxşıyev daha əvvəl kubokda uğur qazanmaq bacarığını ortaya qoyub. Üçüncüsü də, final barədə finalda düşünərsiniz. Bu günlə yaşamaq lazımdır. “Neftçi” indi bir olmalıdır. Rəhbərlikli, məşqçili, futbolçulu, azarkeşli.

Onu da unutmayın ki, “Neftçi” tək rəqibə qarşı mübarizə aparmayacaq. “Kəpəz”lə cavab oyununda Bassala Sambuya göstərilən qırmızı vərəqə, sonradan AFFA İntizam Komitəsinin verdiyi iki oyunluq cəza, həmçinin cəzanın qüvvədə qalması göstərdi ki, flaqman finala çıxmaq üçün tək rəqibi üstələməli deyil. Kubokun həlledici matçına gedən yolda AFFA-nı da, hakimləri də məğlub etmək lazımdır.

“Neftçi” bunu bacarmalıdır. Çünki “Neftçi” flaqmandır! Çünki 88 ilin “Neftçi”sidir, rəqibdən fərqli olaraq dünəni də var, sabahı da. Odur ki, “Neftçi”, bu günün işini sabaha saxlama! Avropaya gedən yol kubokun finalından keçir...  

Dünən xəbər yayıldı ki, kubok oyunu üçün biletlərə endirim edilib. Hər şey stadiona daha çox azarkeşin gəlməsinə hesablanıb. Çünki sabah “Neftçi”nin sözün həqiqi mənasında “12-ci oyunçu”ya ehtiyacı var. “Qarabağ”la son ev oyununda olduğu kimi, “Neftçi Arena”da yenə də izdiham yaşanmalıdır. Bu şəhər “Neftçi”lilərindirsə, əməldə də bunu sabah “Sabah”a göstərin. “Neftçi” azarkeşi, unutma, sabah komandanın sənin dəstəyinə ehtiyacı var.  

Futbolxeber.az