Elvin Məmmədov: “Bu 1 xal bizə xeyir verəcək”

“Bilirdik ki, bizi çətin rəqib gözləyir. “Kəpəz” əsas rəqibimizdir. Oyunun ciddiliyinin fərqinə varırdıq. Məncə, indiki durumda bu 1 xal bizə xeyir verəcək”.

Futbolxeber.az saytının məlumatına görə, bu sözləri “Səbail”in məşqçisi Elvin Məmmədov Azərbaycan Premyer Liqasının 28-ci turunda “Kəpəz”lə 1:1 bərabərə qaldıqları oyundan sonra deyib.

Daha sonra o, jurnalistlərin suallarını cavablandırıb:

- Sanki "Səbail" 1 xal üçün oynayırdı. Turnir cədvəlindəki vəziyyətiniz bunu tələb edir?

- Futbolçuların yerinə danışmaq asan olar. Əziyyəti onlar çəkir. Yorulubsa, bir az vaxt apara bilər. Bu, futbolun qanunudur. Amma bura 1 xal üçün gəlməmişdik, 3 xal üçün gəlmişdik. Şükürlər olsun ən azından uduzmadıq. Çempionat davam edir. Ümidimizi üzməmişik, sona qədər mübarizə aparacağıq.

- Cavid Hüseynovdan əvvəl müvəqqəti baş məşqçi təyin olunmuşduz. Əgər baş məşqçi postunda qalsaydınız, vəziyyət fərqli ola bilərdi?

- Keçmiş qaldı keçmişdə. Qaytara bilmərik. Rəhbərlik sağ olsun ki, həm həmin dövrdə, həm də indi mənə şans verdi. Çətin durumda olan komandaya gənc məşqçini təyin etmək asan qərar deyil. Nəsə demək çətin olar. Bəlkə də vəziyyət daha betər olardı, bəlkə də yaxşı olardı.

- Bundan sonrakı dövrdə komandanı psixoloji cəhətdən hazırlamaq çətin olmayacaq?

- Bununla bağlı həqiqətən də çox işləyirik. Cavid Hüseynovun vaxtında da komanda oynayırdı. Mən də bunu yaşamışam. Uduzduqca futbolçuda düşüş olur. Məqsədimiz futbolçuları psixoloji cəhətdən hazırlamaqdır. Ümid edirəm ki, bu durumdan çıxacağıq.

- Cavid Hüseynovla dost olmusunuz. Onun gedişindən sonra baş məşqçi təyin olundunuz. Bu, münasibətlərinizə təsir etməyəcək?

- Bizim Cavidlə səmimiyyətimizə şübhə olmasın. Ailəvi dostuğumuz var. Mən Cavid Hüseynovdan qabaq da burada idim. Onun komandadan hansı şəkildə getməsi bizim dostluğumuza xələl gətirməyəcək. İnsanlar danışacaq, bu, normaldır. Hansısa insanın ağzını yummaq mümkün deyil.