Roi Kehat: “Özümü qəhrəman saymıram”

“Sumqayıt”ın yarımmüdafiəçisi Roi Kehatın Futbolxeber.az saytına müsahibəsi

- Azərbaycan Premyer Liqasının 26-cı turunda “Kəpəz” üzərində çox vacib qələbə qazandınız. Görüş barədə nə deyə bilərsiniz?

- Bizim üçün çox vacib oyun idi. Hamı hansı vəziyyətdə olduğumuzu bilirdi. Son turlar uğursuz çıxış edirdik. Artıq “Kəpəz” bizimlə xallarını bərabərləşdirmişdi. Ona görə də bizim üçün 3 xal çox vacib idi. Belədə sonuncu pillədəki “Səbail”lə xal fərqini 7-ə çatdıracağdıq. Çox şadam ki, istəyimizə çatdıq və mühüm qələbə qazandıq.

- “Kəpəz”lə oyun finala bərabər hesab olunurdu və uduzacağınız təqdirdə turnir cədvəlində bir pillə də aşağı enəcəkdiniz. Bütün bunlar üzərinizdə əlavə təzyiq yaradırdı?

- Müəyyən qədər təzyiq var idi. Bilirdik ki, qalib gəlməli idik. Buna görə meydana yüksək motivasiya ilə çıxmışdıq. İlk dəqiqələrdən üstünlüyü ələ aldıq. Hər top uğrunda mübarizə aparırdıq.

- “Sumqayıt” bu matçda həm də uzun fasilədən sonra qol vurdu...

- Həqiqətən də xeyli vaxt idi qol vura bilmirdik. Nəhayət ki, bu matçda uğursuz seriyaya son qoyduq. Həm qollar vurduq, həm də qələbə həsrətimiz başa çatdı.

- Demək olar ki, bu qələbə sayəsində “Sumqayıt” Premyer Liqada qalmaq yolunda mühüm addım atdı?

- Qarşıda hələ 10 tur var. Ona görə arxayınlaşmaq olmaz. Daha çox xallar qazanmalı və turnir cədvəlində mümkün qədər irəli getməliyik.

- Dubl etdiniz. Roi Kehat özünü qəhrəman sayır?

- Xeyr, özümü qəhrəman saymıram. Mənim, yaxud başqasının qol vurmağı önəmli deyil. Əsas odur ki, qalib gəldik. Mən komandamın uğuru üçün əlimdən gələni edirəm.

- Növbəti turda “Turan Tovuz”un qonağı olacaqsınız. Uğurlu seriyanı həmin matçda davam etdirmək mümkün olacaq?

- “Turan Tovuz” güclü komandadır. Onlara qarşı oynamaq çox çətindir. Xüsusən də səfərdə, süni qazonda. Bununla belə, qələbə qazanmaq üçün əlimizdən gələni etməliyik. İnanıram ki, səfərdən yaxşı nəticə ilə qayıdacağıq.

Fərəc Aslanov