"Turan Tovuz" bugünkü oyunun təxirə salınmasını istəyir: “Şəffaflığa dair şübhələrimiz var”

Bu gün Azərbaycan Premyer Liqasının 24-cü turunda Şamaxı şəhər stadionunda “Şamaxı” - “Turan Tovuz” oyunu keçirilməlidir.

Futbolxeber.az saytının məlumatına görə, hava şəraiti səbəbindən oyunun canlı yayımının baş tutmayacağı və VAR-ın olmayacağı dəqiqləşib.

"Turan Tovuz" klubu rəsmi şəkildə oyunun təxirə salınması üçün Peşəkar Futbol Liqasına müraciət edib. Klubun bununla bağlı yaydığı bəyanatda deyilir:

“Futbol ictimaiyyətinin diqqətinə!

Bu gün Azərbaycan Premyer Liqasının 24-cü turu çərçivəsində, saat 14:30-da  Şamaxı şəhər stadionunda “Şamaxı” - “Turan Tovuz” oyunun baş tutmalıdır. Ancaq hava şəraiti səbəb kimi göstərilərək oyunun canlı yayımının baş tutmayacağı və VAR-ın olmayacağı dəqiqləşib. Bu səbəbdən klub olaraq rəsmi şəkildə oyunun təxirə salınması üçün Peşəkar Futbol Liqasına  müraciət etmişik. Bir daha bəyan edirik ki, VAR sisteminin və canlı yayımın olmayacağı oyunun şəffaf keçiriləcəyinə dair şübhələrimiz var.  Qeyd etmək istəyirik ki, bir neçə gün öncədən hava şəraitinin kəskin dəyişəcəyi haqda rəsmi proqnoz verilməsinə və bu haqda PFL-ə rəsmi məlumat verməyimizə baxmayaraq bu hadisələr baş verib".

Qeyd edək ki, oyunun saat saat 14:30-da başlanması gözlənilir.