“Zirə”dən “Birbaşa”ya cavab: “Belə çıxır ki, bu da azərbaycanlı məşqçilərə qarşı haqsızlıqdır?”

Minifutbol üzrə “Zirə” klubunun baş məşqçisi Elşad Quliyevin Futbolxeber.az saytına müsahibəsi

- Yarımfinalın cavab görüşündə də “Aznur”u məğlub edərək finala yüksəldiniz. Qələbəni necə şərh edərdiniz?

- Yaxşı oynadıq. İlk matçdan sonra üstünlüyümüz var idi. Lakin bilirsiniz ki, minifutbolda 1, ya 2 top böyük üstünlük hesab olunmur. Ona görə bilirdik ki, çətin matç keçəcək. Bəzi epizodları çıxmaq şərti ilə yaxşı oyun alındı. Həm də indiki məqamda nəticə daha önəmlidir. Çünki elə bir vəziyyət idi ki, hər hansı səhvi düzəltmək üçün imkan olmayacaqdı, geridönüş yox idi.  

- Demək olar ki, bununla da “Zirə” “Aznur”dan ötənilki məğlubiyyətin (ötən il “Aznur” 1/4 finalda “Zirə”ni mübarizədən kənarlaşdırmışdı - İ.C.) əvəzini çıxdı?

- Futbolda heç bir rəqibə yuxarıdan aşağı baxmaq olmaz. Oyun alınmaya bilər, hər an nəticə dəyişə bilər. Dünyanın ən yaxşı komandaları belə bəzən zəif rəqibə uduzurlar. Həm də digər tərəfdən “Aznur” güclü komandadır. Elə bu il Çempionlar Liqasındakı çıxışları ilə bunu sübuta yetirdilər. Çempionatın ən yaxşı komandalarından biridirlər. Bizdə boşluq, arxayınlaşma ola bilməz. Komanda bütün gücünü meydanda qoymalı idi və qoydu da.

- Finalda “Birbaşa Bakı” ilə qarşılaşacaqsınız. Şansları necə dəyərləndirirsiniz?

- “Birbaşa Bakı” hazırda Avropanın ən güclü komandasıdır. Çempionlar Liqasının qalibi oldular. Son illər Azərbaycan çempionu olurlar. Bir az üstün tərəf kimi rəqibi görürəm. Amma biz də sona qədər mübarizə aparacağıq və inanıram ki, finalda qalib gələcəyik.

- Maraqlıdır ki, rəqib baş məşqçi də finalda şansları 51-in 49-a “Zirə”nin xeyrinə dəyərləndirir...

- Mən isə 51-in 49-a “Birbaşa Bakı”nı şansları görürəm. Onlar son çempiondurlar. Həm də cari mövsümün ilk hissəsində də bizə 3:2 hesabı ilə qalib gəliblər. “Birbaşa Bakı” həqiqətən də güclü komandadır. Bir neçə ildir demək olar ki, eyni heyətlə mübarizə aparırlar. Millinin ən yaxşı 6 futbolçusu, hansılar ki, əlimizdən çıxıblar, məhz “Birbaşa Bakı”da cəmləşiblər.

- “Zirə”nin potensialı “Birbaşa Bakı”nın hegemonluğuna son qoymağa imkan verir?

- İnanıram ki, bizdə bu potensial var. Gənc komandayıq və bu heyətlə çempion ola bilərik. 3 həftəyə yaxın vaxtımız var. Rəqibi analiz edəcəyik, finala ciddi hazırlaşacağıq. Final bir oyundan ibarətdir. Bunu az da olsa “Birbaşa Bakı”nın əleyhinə saymaq olar. Çünki onlar bir qədər təzyiq altında olacaqlar. Son illərin çempionu və Çempionlar Liqasının qalibi kimi növbəti titulu qazanmağa çalışacaqlar. Ad, çempionluq əldən gedə bilər. Buna görə “Birbaşa Bakı” daha çox çəkinməlidir. Fikrimiz çempion olmaqdır. Alınmasa, bu, dünyanın sonu deyil. Lakin yenə deyirəm ki, çempionluğumuz mümkündür. Bu potensialımız var.    

- “Birbaşa Bakı”nın baş məşqçisi Dan Mitu sizin son oyunlar üçün heyətə Qazaxıstan millisinin 3 üzvünü cəlb etməyinizi də yaxşı qarşılamadığını dedi. Rumın mütəxəssis bildirdi ki, bu, mövsüm boyu əziyyət çəkən oyunçulara qarşı bir qədər haqsızlıqdır. Eləcə də dünya çempionatı öncəsi Qazaxıstan yığmasını üzvlərinin burada oynaması Azərbaycan millisinin də ziyanına işləyə bilər...

- Tamamilə əks fikirdəyəm. Əsas məsələlərdən biri odur ki, biz inkişaf etmək üçün daha yaxşı futbolçuları cəlb etməliyik ki, bizim çempionatda iştirak etsinlər. Uşaqlar da görsünlər ki, Qazaxıstan millisinin üzvləri bizim oyunçulardan yuxarı səviyyədə deyillər. Ona qalsa, UEFA Çempionlar Liqasına yollanarkən “Birbaşa Bakı” heyətinə fransız futbolçu götürmüşdü və onu heyətində oynadaraq qalib oldu. Onda bu da hansısa oyunçuya qarşı haqsızlıqdır? Mən kiməsə qarşı haqsızlıq etdiyimizi düşünmürəm. Ən əsası da “Birbaşa Bakı”nın baş məşqçisi özü əcnəbidir. Belə çıxır ki, bu da azərbaycanlı məşqçilərə qarşı haqsızlıqdır? Düzgün aspektdən yanaşılmır. Klublar nə qədər güclü olsalar, bu, milli komandanın səviyyəsinin qalxması deməkdir.  

İbrahim Cəfərov