Tovuz stadionunda kameralar quraşdırıldı, azarkeşlərə xəbərdarlıq olundu

Tovuz şəhər stadionunda təhlükəsizliyin təmin olunması üçün kameralar quraşdırılıb.

Futbolxeber.az saytının məlumatına görə, bu barədə klubun yaydığı açıqlamada bildirilib.

Qeyd edilib ki, stadionun tələb olunan standartlara cavab verməsi üçün klub tərəfindən əməli fəaliyyətə başlanılıb: "Təmir-bərpa və yenidənqurma işləri ilə yanaşı, infrastruktur meyarının tələblərinə uyğun olaraq stadionumuzda 10 ədəd həssas kamera quraşdırılıb".

Azarkeşlərə xəbərdarlıq edilib ki, təhlükəsizliyin təmin olunması, neqativ halların qarşısını almaq məqsədi ilə quraşdırılan kameralar vasitəsi ilə hər hansı neqativ hərəkətə yol verən şəxsin kimliyi qısa müddətdə aşkar olunur.

"Qeyd edək ki, neqativ hallar klubun, azarkeşlərin imicinə zərər vurmaqla yanaşı böyük maliyyə cərimələrinə gətirib çıxarır. Odur ki, tribunada yerinizi alın, nümunəvi davranışınız və möhtəşəm dəstəyinizlə həmişə olduğu kimi komandamızın 12-ci oyunçusu siz olun!" - deyə açıqlamada bildirilib.