Qurban Qurbanov: “Bu komanda xırda səhvi də bağışlamır”

"Avroliqada 2025-ci ildə ilk oyunumuzdur. Tam hazır olmaq bizim üçün çox vacibdir. Pis hazırlaşmamışıq. Bəzi problemlərimiz var. Yaxşı komandaya qarşı oynadığımızı bilirik. Rumıniya futbolu həmişə öz ciddiliyi, sərt oyunu ilə seçilib. Sabah vacib mübarizəyə hazır olmalıyıq. Hazırıq da. Vacib qələbə əldə etmək istəyirik".

Futbolxeber.az saytının məlumatına görə, bu sözləri sabah UEFA Avropa Liqasının VII turu çərçivəsində Bakıda Rumıniyanın FCSB klubuna qarşı keçiriləcək oyundan öncə təşkil olunan mətbuat konfransında “Qarabağ”ın baş məşqçisi Qurban Qurbanov deyib.

Mütəxəssis bildirib ki, heyətdəki itkilərə baxmayaraq, hər hansı taktiki dəyişiklik etməyəcək: “Çünki bütün futbolçularla eyni tərzdə məşq edib, düşündüklərimizi meydanda tətbiq etməyə çalışırıq. Hansısa xırda dəyişiklik ola bilər, hücumun qurulmasında, ya başlanmasında. Amma illərdir hansı sistemdə oynayırıqsa, onu daha da yaxşılaşdırmağa çalışırıq. Sabahkı matçda səhvlər etməməliyik. Bu komanda xırda səhvi də bağışlamır. Bəzi məqamlar var, ona çox diqqət ayırmalıyıq. Həmişə oyunumuzu daha da yaxşılaşdırmağa çalışmışıq”.

Q.Qurbanov rəqib klubun prezidentinin "Qarabağ"ı məğlub edəcəkləri barədə fikrinə normal yanaşır: “Bu, idmandır. Hər bir rəqibin rəhbəri, məşqçisi, futbolçusu istənilən açıqlamanı verə bilər. Hərə bir tərzdə verir. Biz də onları məğlub etmək istəyirik. Deyəcək fikrim yoxdur. Normal yanaşıram”.

O, bütün rəqiblərə ciddi yanaşdığını vurğulayıb: “Sadəcə hazırlıq zamanı dəyişiklik olur. Amma FCSB-nin nəticəsini də normal sayıram. Göstərdiyi oyuna, məsuliyyətinə görə haqlı nəticələri var. Bu komandanın ən üstün cəhəti odur ki, müdafiədə, hücumun gedişatında hamı çox sadə və çox kollektiv şəkildə oyun intizamını qoruyub-saxlaya bilir”.

Baş məşqçi "Qarabağ"ın sahibi Abdulbari Gözəlin bir neçə gün əvvəl vəfat etməsinə də toxunub: “Ağır itkidir. Həm klub, həm də Azərbaycan futbolu üçün belədir. Onun "Qarabağ", mənim, həmçinin Azərbaycan futbolu üzərində böyük haqqı var. Atdığı addımı düşünərək edən biri idi. "Qarabağ" klubunun uğuru üçün ürəkdən və sevərək addımlar atıb. Onun kimi insanın bizi tərk etməsi hər birimiz üçün böyük itkidir. Klubda üzgünlük var. Çalışırıq ki, futbolçularımızı oyuna tam hazırlayaq. Nə qədər etsək də, hələ biz bunu yadımızdan tezliklə çıxara bilməyəcəyik. Allah rəhmət etsin”.

“Avropa Liqasında 24-lüyə düşmək üçün bu matçda qələbə qazanmalısız. Bu məqam komandada psixoloji təsir edir?” sualını Qurbanov belə cavablandırıb: “Qələbə üçün hazırlaşmışıq. Sadəcə rəqibi də nəzərə almaq lazımdır. Asan komanda deyil”.

O, matçın hakiminin qəddarlığı ilə seçildiyi ilə bağlı Rumıniya mətbuatında narazılıqlar olması fikrinə də toxunub: “Bu haqda düşünməməyimiz daha yaxşı olar. Oyunqabağı futbolçularımızı psixoloji olaraq buna yönləndirmək düzgün deyil. Amma hər oyundan qabaq futbolçuları hansı hakimin hansı məqama önəm verdiyi barədə məlumatlandırırıq”.

Mütəxəssis Dorinel Muntyanu, Adrian Mutu, Laurentsio Regekampfla müqayisədə digər rumın məşqçi - Mirça Rednikin komandasına qarşı oynamağın maraqlı olduğunu vurğulayıb: “Hər birinə qarşı oynamaq mənim üçün xoş olub və hər biri böyük addır. Futbolda böyük imzaları var. Amma hansının daha güclü olduğunu deməyim düzgün çıxmaz. Mirça Rednikə qarşı oyunlarımız daha maraqlı olub. Amma hər bir halda, hər birinin futbolda böyük imzası var. Onlara uğurlar arzulayıram”.