Kurban Berdıyevdən sərt şillə

Son günlər Azərbaycan futbolunun gələcəyini düşünənlər həyəcan təbili çalırlar. Legioner limitinin ləğvi onsuz da bərbad gündə olan futbolumuzu uçuruma aparacaq. Gəl ki, kimlərsə şəxsi maraqları naminə ölkə futbolunu qurban verməyə çalışırlar. “Sabah” “Qarabağ”ı üstələyib çempion olsun deyə limit ləğv olunmalıdır” düşüncəsi ilə hərəkət edənləri bu gün başqa heç nə maraqlandırmır. Onların vecinə də deyil ki, bu gün maksimum potensial 30-40 üzvü olan Azərbaycan milli komandasında sabah oynamağa futbolçu tapılmayacaq. Bir futbolçu klubunda gününü ehtiyat oyunçular skamyasında keçirəcəksə, sabah milliyə hansı faydanı verə bilər? Neçə gündür bu barədə deyirik, yazırıq. Bəzi mütəxəssislər də, veteran, eləcə də hazırkı futbolçular da limitin ləğvinə haqlı olaraq qarşı çıxırlar, etiraz edirlər.

Dünən bu sıraya “Turan Tovuz”un baş məşqçisi Kurban Berdıyev də qoşuldu. Təcrübəli mütəxəssisin limitin ləğvi ilə bağlı açıqlamarını bu qərarın tərəfdarlarına sərt şillə də adlandırmaq olar: “Tutaq ki, ancaq 11 legioner oynayacaqsa, onda bizim akademiyalar nə işə yarayır? Onda bizim uşaqlar, indi oynayan azərbaycanlı futbolçular harada çıxış edəcəklər? Bu məsələni müzakirə edərkən ilk növbədə Azərbaycan milli komandasının strateji xəttini, ölkənin nüfuzunu əsas götürmək lazımdır. Yenə də təkrarlayıram, belə məsələni qaldıran insanlar bu barədə düşünürlərmi?”

Xeyr, Kurban bəy, düşünürmürlər. Onları yalnız şəxsi maraqları düşündürür. Yetər ki, “Sabah” çempion olsun, vəssəlam. Azərbaycan milli komandası D yox, lap Z Liqasına yuvarlansın, veclərinə də deyil.

Berdiyevdən başqa bir sitat: “Uşaq və yeniyetmə milli komandalarının strateji inkişafı nəzərə alınmırsa, onda ölkə futbolunun nüfuzu olmayacaq. Məncə, biz anlamalıyıq ki, bu qərar sadəcə olaraq uşaq və yeniyetmə futbolunu öldürəcək”.

Öldürsün də, Kurban bəy, guya İcraiyyə Komitəsinin bəzi üzvlərinin bu, vecinədir? Əlbəttə ki, yox. Onları yalnız şəxsi mənafeləri maraqlandırır. Nə yolla olur-olsun, “Sabah” çempion olmalıdır, vəssəlam.

Bir də onu əlavə edək ki, kim deyir ki, limit ləğv olunsa, azərbaycanlı futbolçular gedib xaricdə oynayacaqlar, inkişaf edəcəklər və s. – bunlar yalnız absurd qərara don geyindirməkdir. Bu gün məsələn, Amin Seydiyev hara gedəcək? Maksimum Türkiyənin birinci liqasına. Hansı ki, orda bu gün millinin əsas üzvü sayılan Ramil Şeydayev özünü göstərə bilmədi. Yığmamızın digər qol ümidi Renat Dadaşov mövsüm başlayandan “Ankaragücü”nün heyətində 12 matça çıxıb ki, onlardan da cəmi 5-də 90 dəqiqə meydanda olub.

Odur ki, özümüzü yalandan aldatmayaq. İndi 2002-ci il deyil. Limitin ləğvi ilə heç kim heç yana gedən deyil. 3-5 nəfər legioner həyatı yaşayacaq, ya yaşamayacaq, vəssəlam. Digərlərinin yeri olacaq I, II Liqa...

İBRAHİM