Dünyada 2024-cü ilin ən kobud 3 futbolçusu: siyahıda "Qarabağ”lı da var

Beynəlxalq Futbol Tarixi və Statistikaları Federasiyası 2024-cü ilin ən kobud üç futbolçusunun adını açıqlayıb ki, siyahıda azərbaycanlı futbolçu da var.

Futbolxeber.az saytının məlumatına görə, hər 3 futbolçu il ərzində hamıdan çox - 4 qırmızı vərəqə alıb.

Birinci yeri “Vasko de Qama”nın (Braziliya) müdafiəçisi Joau Viktor tutur. O, 37 matçda ən çox cəzalanan oyunçudur.

İkinci yerdə Braziliyanın başqa bir klubu “Juventude”nin oyunçusu Alan Ruşel qərarlaşıb. O, 4 qırmızı vərəqəni 48 matçda alıb.

İlk üçlüyü “Qarabağ”ın müdafiəçisi Elvin Cəfərquliyev qapayır. Ona da 4 “qırmızı” göstərilib. Lakin digərlərindən fərqli olaraq, Elvinin cəzaları 53 oyunu əhatə edib.

24 yaşlı sol cinah müdafiəçisi bütün bu vərəqələri klubunun oyunları zamanı alıb. Cəfərquliyev 2024-cü ildə 3 Avroliqa matçı - “Braqa”, “Bayer” və “Ayaks”la görüşdə, 1 dəfə isə Azərbaycan Premyer Liqasının “Araz Naxçıvan”a qarşı matçında qırmızı alıb.