“Digərləri dəhşət futbol oynayır, tək "Neftçi" oynamır demək düzgün deyil”

“Azarkeşlərimizə təşəkkür edirəm. Uzun yol gəlib bizi dəstəklədilər. Birinci hissədə rahat idik, oyunu idarə edirdik. İkinci yarıda gözlədiyimiz epizoddan qol buraxdıq. Ozobiç və Boqomolskinin yorulması öz sözünü dedi. Rəqib standart vəziyyətlərdə təhlükəlidir. Futbolçularım mübarizə apardı. Burada hər rəqib çətinlik çəkir. 10-12 günlük istirahətə gedirik. Buna ehtiyacımız var”.

Futbolxeber.az saytının məlumatına görə, bu sözləri “Neftçi”nin baş məşqçisi Samir Abasov Azərbaycan Premyer Liqasının XVIII turunda “Turan Tovuz”la oyundan (1:1) sonra deyib.

O, Ervin Koffini mərkəzdə oynatmağı əvvəlcədən planlaşdırmadığını bildirib: “Amma məşqdə bir az üzərində işləmişdik. Həmin mövqenin oyunçularını olmaması təsirsiz ötüşmür”.

Mütəxəssis zamana ehtiyac duyduqlarını qeyd edib: “Şəxslər üzərində danışmayacam. Mən burada bunu deməyəcəm. Hər şey nəzarətimiz altındadır. Oyunu otuzdurmaq üçün zaman lazımdır. Bizim üçün hələ ki, prioritet nəticədir. Digər komandalar dəhşət futbol oynayır, tək "Neftçi" oynamır demək düzgün deyil”.

S.Abasov yaya kimi çətinliklər çəkəcəklərini bildirib: “Qələbələr qazandıqca nələrisə düzəldə biləcəyik. Bəzi futbolçular uduzmaqdan qorxur. Yalnız qələbə ilə bunu aradan qaldıra bilərik. "Neftçi" olaraq işimiz çoxdur və dayanmadan işləyirik”.

“Neftçi”nin çalışdırıcısı transferlər üzərində çalışdıqlarını vurğulayıb: “Gücləndirməli olduğumuz mövqelər var. Amma qışda transfer etmək çətindir. Əlimizdə olan oyunçuları göndərsək, bunun əziyyətini çəkə bilərik”.

O, “Dominant "Neftçi"ni nə vaxt görəcəyik?” sualını belə cavablandırıb: “Martın 22-si (gülür). Nə deyim sizə?”

Abasov Kilan Lebonun oynamamasının səbəbini zədə ilə izah edib: “Bütün futbolçular bizimlə Tovuza gəlmişdi. Çünki çox vacib matç idi. Oynamamağı zədə səbəbindəndir. Tək Lebonu deməzdim, komanda şəklində yaxşı deyilik”.