Azər Bağırov “Kəpəz”dəki fəaliyyətini qiymətləndirdi: “Hələ ki, qənaətbəxşdir”

“Son matçlarda komanda yaxşı oynayır. Sadəcə qələbə qazana bilmirik. Bu gün meydanda "Kəpəz" var idi. Hər iki hissədə qol epizodlarımız oldu. Çox təəssüf ki, qalib gələ bilmədik. Gələcəyə baxmalıyıq. Bizi qarşıda çox çətin ikinci yarı gözləyir”.

Futbolxeber.az saytının məlumatına görə, bu sözləri "Kəpəz"in baş məşqçisi Azər Bağırov Azərbaycan Premyer Liqasının 18-ci turunda "Sumqayıt"a qarşı keçirilən oyundan (0:0) sonra deyib.

O, qış fasiləsində heyətdə kütləvi dəyişiklik gözlənilmədiyini bildirib: “Hazırkı büdcəmizlə heyətdə böyük dəyişikliklər etmək mümkün deyil. Sadəcə 3-4 futbolçunu dəyişmək istəyirik. Bu yöndə işlərimiz gedir. Əsasən də qol hissiyyatı olan futbolçular axtarırıq. Bəlkə də çempionatda heç kimin bizim qədər qol epizodu olmur. Amma dəyəndirə bilmirik. Buna görə də heyifsilənirik”.

A.Bağırov "Kəpəz"dəki fəaliyyətini belə qiymətləndirib: “Altıncı turdan "Kəpəz"dəyəm. İlk 3-4 turda axsamalar oldu. Ondan sonra komanda nə istədiyimizi bilirdi. İkinci dövrədə artıq xallar topladıq. Məncə, hələ ki, qənaətbəxşdir. Daha yaxşısını etməyə çalışacağıq”.

“Braqanın epizodları dəyərləndirə bilməməsinin səbəbi nədir?” sualını “Kəpəz”in baş məşqçisi belə cavablandırıb: “Ustalıqla bağlı olduğunu düşünürəm. Xallar əziyyətlə qazanılır. Braqa bəlkə də ən çox qaçan futbolçudur. Sadəcə ustalıq məsələsi öz sözünü deyir”.