Vaqif Cavadov: “Bu istəklə, bu oyunla yaxşı işlər görə bilərik”

“Oyun maraqlı və gərgin alındı. Komandamdan çox razıyam. İlin son matçında bu cür istəkli oynamaq məni sevindirir. İnanıram ki, bu istəklə, bu oyunla yaxşı işlər görə bilərik”.

Futbolxeber.az saytının məlumatına görə, bu sözləri “Sumqayıt”ın baş məşqçisi Vaqif Cavadov Azərbaycan Premyer Liqasının XVIII turunda “Kəpəz”lə heç-heçə etdikləri oyundan (0:0) sonra deyib.

O bildirib ki, matçın əvvəlində komandasında özünəinam az idi: “Bununla belə, ilk hissədə yaxşı hücumlarımız oldu. Futbol oynaya bilirik, komanda hücuma çıxmağı bacarır. Sadəcə son nöqtəni qoya bilmədik. Meydança amili, ilin son matçının olması da təsir edə bilər”.

V.Cavadov “Sumqayıt”ın bəzi futbolçularının adlarının “Neftçi” ilə yanaşı hallanmasına belə münasibət bildirib: “Komandadan futbolçu gedirsə, bu, hər məşqçini narahat edə bilər. Amma futboldu belə hallar olur. Müqaviləsi bitən futbolçuların gedişinə normal yanaşmalıyıq. Biz də kimlərisə transfer edirik. "Neftçi" kimi komandanın bizim oyunçuları istəməsi xoşdur. Hər futbolçumuzun arxasındayıq. Onların heç birinin gedişini istəmirik”.

Məşqçi kimisə icarəyə vermək üçün heyətlərinin geniş olmadığını söyləyib: “Sumqayıt”da olduğum müddətdə futbolçuların inkişafı üçün onlara hər cür kömək edəcəm”.