“Dinamo”nun baş məşqçisi: “Meydançaların vəziyyəti II Liqanın səviyyəsini aşağı salır”

II Liqada mübarizə aparan “Dinamo”nun baş məşqçisi İsmayıl Vəkiliqazicahaninin Futbolxeber.az saytına müsahibəsi

- İlin son turunda komandanız “Ağdaş”a 3:4 hesabı ilə uduzdu. Bu məğlubiyyəti nə ilə əlaqələndirmək olar?

- Oyuna yaxşı hazırlaşmışdıq. İli qələbə ilə başa vurmaq istəyirdik. Buna qədər son 2 matçda gözəl oyunla qələbə qazanmışdıq. Təəssüf ki, komandamızda olan bir problem yenə özünü büruzə verdi. Demirəm zəif, amma keyfiyyəti bizdən aşağı olan komandalarla matçda uşaqlar əziyyət çəkirlər. Bu cür rəqiblərlə görüşlərdə bacarıqlarını tam göstərə bilmirlər. Arxayınlaşırlar ki, rahat oynayacağıq və qələbə qazanacağıq. Qapıçının səhvindən sonra 2 qol buraxdıq. Digər iki qol da elə arxayınçılıqdan oldu. Bu məsələni yoluna qoymalıyıq.

- Ola bilər ki, “Hypers Guba” və “Göygöl” üzərindəki qələbələr futbolçularda arxayınlıq yaratsın?

- Son iki qələbə bizim üçün yaxşı nəticə idi. Lakin komandamızın əsasını gənclər təşkil edir. Onlar isə təcrübəli, tam peşəkar deyillər. Peşəkar futbolçu komandası relsə düşəndə bilir nə etmək lazımdır. Belə görünür ki, bizim futbolçuların hamısı bu vəziyyətdə nə etməli olduqlarını bilmirlər.

- 13 turdan sonra “Dinamo” “Şəmkir”lə birgə turnir cədvəlində 7-8-ci yerləri bölüşdürür. Mövsümün geridə qalan hissəsini komandanız üçün necə dəyərləndirirsiniz?

- Az əvvəl dediyim kimi, komandamızın əsasını gənclər, akademiyamımızın yetirmələri təşkil edir. Bu, bizim yolumuzdur. Necə deyərlər, öz yolumuzu tapmışıq. Gələcəyə baxırıq. Məqsədimiz Azərbaycan futboluna fayda verməkdir. İnanıram ki, yetirmələrimiz Azərbaycan futbolunda öz sözlərini deyəcəklər. Qarşıdan fasilə gəlir. Futbolçulara bir qədər istirahət verəcəyik. Daha sonra məşqləri bərpa edəcəyik. Fasilə müddətində çatışmazlıqları aradan qaldırmaq üçün tam gücümüzlə çalışacağıq.

- Siz qeyd etməsəniz də, görünən odur ki, istər oyun, istər nəticə baxımından “Dinamo”da irəliləyiş var.

- Bəli, komandamızda inkişaf var. Lakin bununla kifayətlənmək olmaz. Daha çox çalışmaq lazımdır.

- II Liqadakı rəqabəti, çempionatın səviyyəsini necə dəyərləndirirsiniz?

- Rəqabət yaxşıdır. Çempionatda güclü kollektivlər var. Əsas problem stadionlarla bağlıdır. Hətta mən deyərdim ki, meydançaların vəziyyəti II Liqanın səviyyəsini 60-70 faiz aşağı salır. Xüsusən də bölgələrdəki arenaların vəziyyəti ürəkaçan səviyyədə deyil. Qışda, qar və yaxud yağış yağdıqda meydançanın durumu lap pis vəziyyətə düşür. Bu halda komandalar əziyyət çəkirlər. Pis vəziyyətdə olan meydançalar futbolun keyfiyyətini aşağı salır.

- Liqa ilə bağlı müsbət məqam kimi nələri qeyd edə bilərsiniz?

- Təşkilatçılar liqanı maraqlı etmək üçün əllərindən gələni edirlər. Ayın ən yaxşı qolu layihəsini qeyd edə bilərəm. Komandamızın üzvü Valeh Seyidov da bu müsabiqədə qalib olub. Bu cür layihələr futbolçular üçün əlavə stimuldur.   

Fərəc Aslanov