Elmar Baxşıyevdən qələbə şərhi

"Araz-Naxçıvan"ın baş məşqçisi Elmar Baxşıyev Azərbaycan Premyer Liqasının 16-cı turunda "Səbail"ə qalib gəldikləri oyundan sonra fikirlərini bölüşüb.

Futbolxeber.az saytının məlumatına görə, o, komandasının 2:0 hesablı qələbəsini belə şərh edib: “Süni meydanda oynayacağımıza görə oyunun ağır keçəcəyini bilirdik və komandanı da həftə ərzində buna hazırlamışdıq. Oyuna istədiyimiz kimi başlamasaq da, tədricən ritmə uyğunlaşdıq. Komandamı qələbə münasibəti ilə təbrik edirəm. Oyun planında artırmaq üçün potensialımız var. Qarşıdakı oyunlarda daha məzmunlu oynayacağıq. Çempionatın sonunu yox, hər həftə keçirəcəyimiz matçı düşünürük”.

Mütəxəssis gənc oyunçularının göstəricilərindən də söz açıb: "Futbolda cavan-yaşlı anlayışı keçmişdə qaldı. İşə yanaşma, istək önəmlidir. Bu gün məşq prosesində gənc və yaşlı dediyimiz futbolçular eyni yükləməni alır. Siz onları həftədə bir dəfə - oyun zamanı görürsünüz, biz həftə ərzində birgə calışır, istədiklərimizi alırıq. Heyətimizdə nəticəyə ac futbolçular cəmləşib. Oyunlara düzgün hazırlaşır və yanaşırlar. Ona görə də nəticələrimiz ürəkaçandır. Qazandığımız nəticələr, uğurlu qrafik onların əməyinin nəticəsidir".