“Xəzər Lənkəran”a gəlməyimin əsas məqsədi klub prezidentini tanımağımdır”

“Xəzər Lənkəran”a gəlməyimin əsas məqsədi klub prezidentini tanımağımdır. Komandanın uşaq futbolunu yüksəltmək lazımdır. Mübariz Mənsimovla İstanbulda 3 il əvvəl “Beşiktaş”da bir yerdə olmuşuq. “Xəzər Lənkəran”ı imkan olduqca avrokuboklarda təmsil etmək, ölkə kubokunda irəli getmək istəyirik”. Futbolxeber.az-ın məlumatına görə, bu sözləri “Xəzər Lənkəran”ın baş məşqçisi Mustafa Dənizli deyib.

Bu gün rəsmən ictimaiyyətə təqdim olunan türkiyəli mütəxəssis ölkəmizdə olduğundan məmnunluq duyduğunu bildirib: “Azərbaycan xalqının həzz alacağı bir komanda qurmaq istəyirik. Komandanı tanıyıram. Amma daha da tanımağım lazımdır. Burda olmaqdan son dərəcədə məmnunam. Bura mənim öz ölkəm kimidir”.

Dənizli komandanın transfer çalışmalarına da toxunub: “Dövrələrarası fasilədə transfer ehtiyac olarsa, ediləcək. Bu xaricdən də, Türkiyədən də ola bilər. Türkiyədə oynamaq şansı əldə etməyənlər varsa və burda adaptasiya prosesi olmayacaqsa, ilk transferlərimiz Türkiyədən olacaq”.