“Neftçi”nin Fil Fodeni: “İstəyirəm ki, təkcə xarici görünüş yox, oyun tərzimə görə də ona oxşayım”

Son turlar “Neftçi”nin heyətində adından söz etdirən Murad Məmmədov klubun yetirməsidir. Cari mövsümün kəşflərindən olan 18 yaşlı futbolçunun Futbolxeber.az saytına müsahibəsini təqdim edirik.

- Son turda “Neftçi” “Zirə” ilə matçda qələbə qazansa da, bu dəfə səni meydanda az gördük...

- Mənim üçün hər dəqiqənin, hər saniyənin önəmi var. Bu yaşda “Neftçi”nin əsas komandasında olmağın özü mənim üçün qürurdur, fəxrdir. Baş məşqçimiz nə məsləhət bilirsə, onu da edirəm. Növbəti matçlarda şans qazanacağım halda, əlimdən gələni edəcəyəm.

- Əvvəlki turda “Şamaxı” ilə matçda inamlı təsir bağışladın, baxımlı qola imza atdın. O cür oyundan sonra ehtiyatda qalmaq psixoloji baxımdan sənə mənfi təsir etmədi?

- Bunun mənim üçün heç bir mənfi təsiri yoxdur. Komandamın uğuru hər şeydən vacibdir. Biz “Neftçi”nin adı uğrunda mübarizə aparırıq. Hər qazandığım dəqiqəyə görə şükür edirəm.

- Sabah “Qarabağ”la qarşılaşacaqsınız. Bu matçdan gözləntilərin nədir?

- Oyuna ciddi hazırlaşmışıq. Bizim üçün əhəmiyyətli matçdır. Bütün Azərbaycan bu görüşü gözləyir. Əlimizdən gələni edəcəyik ki, qələbə qazanaq. 3 xal üçün meydanın hər qarışı uğrunda mübarizə aparacağıq.

- “Neftçi”nin heyətində təcrübəli, tanınmış futbolçu kifayət qədərdir. Məşqlərdə ən çox kimdən öyrənməyə çalışırsan?

- Komanda yoldaşlarımın hamısı təcrübəlidir. Böyük qardaşlarımdır və hər birindən nəsə öyrənməyə çalışıram. Xüsusən də Emin Mahmudovun adını çəkə bilərəm.

- Bəs dünya futbolunda mövqeyin üzrə oxşamaq istədiyin, kumirin var?

- Kumirim Fil Fodendir. Çoxları xarici görünüşümə görə də məni ona bənzədir (gülür). İstəyirəm ki, təkcə xarici görünüş yox, oyun tərzimə görə də ona oxşayım.  

- Əksər azərbaycanlı futbolçular azca parlayan kimi ulduz xəstəliyinə tutulurlar. Bəs sən bu xəstəliyə yoluxmamaq üçün nələr edirsən?

- Hər uğurumda başımı aşağı salıb işimi görürəm. Bir iş üçün yola çıxmışam. Valideynlərimin arzusudur ki, yaxşı futbolçu olum. Özümü göstərmək üçün əlimdən gələni edirəm. Məqsədim “Neftçi”yə xeyir verməkdir.

İbrahim Cəfərov