Varvodiç gedişinin səbəbini açıqladı: “Oynamaq istəyirəm”

“Qarabağ”da 1,5 il möhtəşəm zaman keçirmişəm. İlk dəfə “Köln”dən “Qarabağ”da gələndə klub, ölkə haqqında elə də məlumatım yox idi. Amma geridə buraxdığımız zaman müddətində atdığım addımın doğruluğunu gördüm”. Futbolxeber.az-ın məlumatına görə, bu sözləri “Qarabağ”la yollarını ayıran Miro Varvodiç deyib.

Ağdam klubunun rəsmi saytına danışan 24 yaşlı qolkiper meydana çıxmadığı üçün klubu dəyişmək qərarına gəldiyini bildirib: “Karyeramı düşünməliyəm. Həm Fərhad, həm də Seriç yetərincə yaxşı qolkiper və yaxşı insandırlar. Mən də oynamaq istəyirəm. Bu səbəbdən klubla görüşdüm və daim oynamaq niyyətimə görə ayrılmaq istədiyimi bildirdim. Sağ olsunlar, məni anlayışla qəbul etdilər. “Qarabağ” karyeramı özüm üçün itirilmiş hesab etmirəm. Ötən mövsüm çempionluğu son anda əldən verdik. Avrokuboklarda əla çıxış etdik. “Qarabağ”da hər kəsə təşəkkür edirəm. Daim bizi dəstəkləyən azarkeşlərimizə çox sağ ol deyirəm. Onları heç vaxt unutmayacam”.