Emin Əmrullayev: ““Neftçi” birinci yerdə deyilsə, bu, artıq uğursuzluqdur”

“Nəticə göz qabağındadır. Azarkeşləri başa düşmək olar. Klub rəhbərliyi əlindən gələni edir. Bunu hamı görür. Son məşqçi ilə alınmadı. Amma Roman Qriqorçuk kifayət qədər peşəkar məşqçidir”.

Futbolxeber.az saytının məlumatına görə, bu sözləri “Neftçi”nin Müşahidə Şurasının üzvü Emin Əmrullayev komandanın hazırkı durumu barədə danışarkən deyib.

O, yeni baş məşqçi axtarışlarının davam etdiyini bildirib: “Təhlil aparılır. Nəyisə deməyim düz olmaz. İdman bölməsi tərəfindən rəhbərliyə namizədlər təklif olunub. Yaxın gələcəkdə yeni baş məşqçinin adını siz də biləcəksiniz”.

E.Əmrullayev Roman Qriqorçuku böyük ümidlərlə komandaya cəlb etdiklərini xatırladıb: “Futbolda belə anlar. Biz mövsümə ümidlə başladıq. Futbol ictimaiyyəti də Roman Qriqorçukun təyinatını səhv qərar kimi görmədi. Təəssüf ki, belə alındı. “Neftçi” rəhbərliyi nəsə etməli idi. Ona görə də baş məşqçi dəyişikliyinə getmək məcburiyyətində qaldıq. Qriqorçukla peşəkar formada yollar ayrıldı. İstəməzdik ki, belə olsun. Ən düzgün qərarı verməyə çalışırıq. Baza və digər istiqamətlərdə işlər gedir. İnanıram ki, bu qədər işin nəticəsini görəcəyik”.

“Sizcə, yeni baş məşqçi yerli olmalıdır, yoxsa əcnəbi?” sualını o belə cavablandırıb: “Mən məsələyə belə baxmıram. Bu, şəxsi qərar deyil. Ad çəkməyim düz olmaz”.

Müşahidə Şurasının üzvü “Neftçi”nin cari mövsümdə avrokuboklara vəsiqə qazanacağına inanır: “Əlbəttə, şans var. “Neftçi”yə qələbə yaraşır. “Neftçi” birinci yerdə deyilsə, bu, artıq uğursuzluqdur. Məqsədimiz “Neftçi”ni Azərbaycanın birinci klubu etməkdir. Bəzən nəsə alınır, bəzən nəsə alınmır. İndi komandanın dəstəyə ehtiyacı var”.

Emin Əmrullayev qeyd edib ki, ötən il Adrian Mutu ilə vidalaşmaq fikrində olmayıblar: “Ötən mövsümə gec başladıq. Mutu ilə işləməkdə qərarlı idik. Onun ailəsində problem ortaya çıxdı. Bu səbəbdən də yollarımızı ayırdıq. Mutu uzunmüddətli proekt idi. Biz ona zaman verməyə hazır idik. İşindən də razı qaldığımız məqamlar az deyildi. Daha sonra Bojoviçi gətirdik. Mövsümün sonunda nəticə ürəkaçan olmadığı üçün yollarımızı ayırdıq”.

O, azarkeşləri başa düşdüyünü bildirib: “Biz də onlar qədər məyusuq. İndiki vəziyyətdən heç kim məmnun deyil. Klubda hamı məsuliyyətini başa düşür. Əlimizdən gələni edirik ki, yeni baş məşqçi ilə bağlı doğru qərar verək”.