“Qarabağ”a 2 qol vuran “Malmö”lü: “Yüksək səviyyəli rəqibi məğlub etdik”

“Çox çətin oyun keçdi. Bilirdik ki, “Qarabağ” güclü komandadır”.

Futbolxeber.az saytına açıqlamasında bu sözləri “Malmö”nün hücumçusu Erik Botheym UEFA Avropa Liqasının ikinci turu çərçivəsində “Qarabağ”a Bakıda 2:1 hesabı ilə qalib gəldikləri oyun barədə danışarkən deyib.

Norveçli forvard Azərbaycan çempionuna hörmətlə yanaşdıqlarını bildirib: “Çünki “Qarabağ” buna layiqdir. Qələbə qazansaq da, bu, bizə çox çətinliklə başa gəldi. Dediyim kimi, “Qarabağ” yaxşı komandadır. Xüsusən də oyunçular fərdi cəhətdən çox güclüdürlər”.

E.Botheym “Qarabağ”ı yaxşı analiz etdiklərini vurğulayıb: “Matça çox ciddi hazırlaşmışdıq. Məşqçilərimiz bütün lazımi məlumatları bizə çatdırmışdılar. Əlimizdən gələni etdik ki, “Qarabağ” istədiyi futbolu oynaya bilməsin. Əks halda işimiz çox çətin olardı”.

24 yaşlı futbolçu komandaların qarşıdakı matçlarında da söz açıb: “Bu gün 2 qol vurduq, qələbə qazandıq. Buna görə çox sevinirik. Yüksək səviyyəli rəqibi məğlub etdik. Qarşıdakı matçlarda da uğurlu çıxış etmək üçün çalışacağıq. “Qarabağ”ın növbəti oyunlarda nəticə qazanacağına inanıram. Çünki bu komanda həqiqətən də güclüdür”.

Fərəc Aslanov