Qriqorçuk: “Onları vurmalıydıq”

“Təsdiqləyirəm ki, nəticədən narazı qaldım. Amma bizim yaxşı olmaq potensialımız var. Oyunçularımızın çoxu komandaya tam inteqrasiya olmayıblar. Bu cəhətdən axsamalarımız var”.

Futbolxeber.az saytının məlumatına görə, bu sözləri “Neftçi”nin baş məşqçisi Roman Qriqorçuk Azərbaycan Premyer Liqasının V turunda səfərdə “Şamaxı” ilə qolsuz bərabərə qaldıqları oyun barədə danışarkən deyib.

Ukraynalı mütəxəssis əvvəlki 4 oyunla müqayisədə komandasında inkişaf olduğunu bildirib: “Birmənalı deyərəm ki, bugünkü və əvvəlki oyunları nəzərə alsaq, fərq böyükdür. Çünki bu gün qol epizodları yaratdıq. Onları vurmalıydıq”.

O, 5 oyunda cəmi 2 qol vurmalarına belə münasibət bildirib: “Bu gün çoxlu qollar vura bilərdik. Çünki cəmi bir qol epizodu yaratmamışdıq. Amma yaradılan şanslardan yararlana bilmədik. Çətinliyimiz bunda idi”.

“Neftçi”nin çalışdırıcısı milli komandanın oyunlarına görə fasilə yaranmasının komandasına faydalı olacağını qeyd edib: “Bizim üçün bu fasilə çox vacibdir. Komandamızın daha da yaxşı komplektləşməsi üçün belədir. Obyektiv səbəblərə görə tam olaraq işləyə bilmədiyimiz faktorların üzərində fasilədə çalışacağıq. İstəyirik ki, komandamız daha da sərt şəkildə hücumlar yaratsın. Bu gün bir neçə epizodda bunu görə bildik. Amma daha yaxşısını görmək istəyirik”.

R.Qriqorçuk qeyd edib ki, “Neftçi” yayda indiki heyətlə toplanış keçsəydi, daha da yaxşı oynayardı: “Amma bəzi səbəblər var ki, bilirik, bəzilərini bilmirik. O səbəblərə görə belə başlamalı olduq. Şükürlər olsun ki, düzgün yoldayıq, düzgün yanaşmadayıq. Ümid edirəm ki, qarşıdakı günlərdə zədəlilərimiz də bizimlə ilə birlikdə olacaq və komandanı istədiyimiz kimi komplektləşdirəcəyik. Unutmaq olmaz ki, 3-4 aparıcı oyunçumuz zədəlidir”.

İbrahim Cəfərov, Şamaxı