Vətən, Bayraq, Sakarya... - Santuşun çıxışına qısa sözardı

İstər azarkeşlər, istər jurnalistlər arasında Fatih Terimlə bağlı məşhur “Vətən, Bayraq, Sakarya...” söhbəti var. Çoxlarına məlumdur ki, Türkiyə futbolunun “İmperator”u qazandığı uğurları fiziki, texniki, taktiki hazırlıqdan daha çox psixoloji hazırlıq sayəsində əldə edib. Belə görünür ki, milli komandamızın baş məşqçisi Fernandu Santuş da ölkəmizdə olduğu qısa müddətdə başa düşüb ki, bizim futbolçularla millinin uğur qazanması çox çətindir. Ona görə də gücü verib psixoloji hazırlığa. İşə isə mətbuatdan, azarkeşlərdən başlayıb. Portuqaliyalının dünənki mətbuat konfransı başdan-ayağa pafos üzərində qurulmuşdu: “Çox kompakt, istəkli, vətən üçün, bayraq üçün əzmkarlıq göstərəcək komanda yaratmaq arzusundayıq... Hamımız burdayıq ki, Azərbaycan naminə nəsə edək. Əsas Azərbaycanın adı, bayrağıdır”.

Portuqaliyalı sanki boğazdan yuxarı sözləri ilə azarkeşləri də, mətbuatı da ələ almağa çalışırdı. Qismən də istəyinə çatdı. Necə pafoslu çıxış etdisə, özünü əvvəldən sığortalaması, indidən mümkün uğursuzluq halında yaxasını kənara çəkməsi diqqətdən yayındı. Əks halda Santuşun “Reallıqlarla barışmaq lazımdır. Cəlb etdiyim futbolçular mənimlə ilk dəfə işləyəcəklər. Biz onları, onlar da bizi tanıyacaqlar. İsveçlə oyuna qədər cəmi bir neçə məşqimiz olacaq. Fiziki baxımdan hansısa dəyişiklik etməyə imkanımız yoxdur. Futbolçular klublarında necə hazırlıq keçiblərsə, elə də olacaq” fikirlərinə reaksiya verən olardı. Amma portuqaliyalıya nə “Sizə elə gəlmir ki, bu sözlərlə indidən özünüzü uğursuzluqdan sığortalayırsınız?” sualını verən oldu, nə də Səbuhi Abdullazadə, Rüfət Abdullazadə kimi gənclərin hansı əsasla millidən kənarda qalmasını soruşan oldu. Heç bilinmədi ki, Nəriman Axundzadə hansı fövqəl çıxışına görə milliyə dəvət alıb?..

İbrahim Cəfərov