Samir Abasov: “Məşqçi kimi mənim bu məsələdə bacaracağım bir şey yoxdur”

“Rəqibi təbrik edirəm. Oyun elə gedirdi ki, ya heç-heçə olacaq, ya da kimsə bir qol vurub qələbə qazanacaq. Meydanda mübarizə var idi. Həddən çox mübarizə olanda da futbol ikinci plana düşür. Qol buraxandan sonra çalışdıq ki, oyunu əla alaq, amma olmadı. Növbəti matçlara hazırlaşacağıq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının V turunda “Araz-Naxçıvan”a 0:1 hesabı ilə uduzduqları oyundan sonra deyib.

Mütəxəssis daha sonra jurnalistlərin suallarını cavablandırıb:

- Yeni transferlər gözləntiləri doğrultmur. Bu, nə vaxta qədər davam edəcək?

- Düzələnə kimi davam edəcək. Futbolçular təzə gəliblər. Onlara da zaman lazımdır. Biz də istəyirik ki, yeni gələnlər komandaya uyğunlaşsın. Yəqin, milli fasilə bizə kömək olacaq.

- Mübarizəni keyfiyyətə çevirmək üçün nə çatmır?

- Roy Kehatın yoxluğu özünü göstərirdi. Hücumda "dişli" deyilik. Buna görə də keyfiyyətə çevirə bilmirik.

- Rövlan Muradovun problemi nədir?

- Həmin mövqedə rəqabətsiz oynayır. Biz o mövqe üçün Sərtan Taşkını gətirdik. O da hələ hazır deyil. Rövlan topu itirəndən sonra danışmağa çox vaxt ayırır, nəinki qaçmağa. Buna görə əsəbiləşdim. Onun top itkisi qolla nəticələndi. Onu başa salacağıq, cəzasını da alacaq. Keçən ilki zədədən sonra özünə gələ bilmir. Belə davam edə bilməz. Həmin mövqeyə rəqabət gətirmək lazımdır.

- Komanda Konfrans Liqasına vəsiqə qazananda hamı düşünürdü ki, hazır futbolçular gələcək. Amma indiki vəziyyət o deyil...

- Sırf maliyyə ilə bağlıdır. Çempionatı davam edən ölkədən hazır oyunçunu gətirmək üçün klubuna pul verməlisən. Biz də bunu edə bilmirik. Maliyyə baxımından uyğun olanları gətiririk. Məşqçi kimi mənim bu məsələdə bacaracağım bir şey yoxdur.