“Zirə”nin hücumçusu: “Hər dəfə VAR, VAR, VAR - bilmirəm buna necə reaksiya verim”

“Zirə”nin hücumçusu Rüstəm Əhmədzadənin Futbolxeber.az saytına müsahibəsi

- Azərbaycan Premyer Liqasının IV turunda “Şamaxı”ya 0:1 hesabı ilə uduzdunuz. Məğlubiyyətə səbəb nə oldu?

- Əslində pis oynamadıq. Erkən qol buraxdıq. Sonra oyunda dönüş yaratmaq üçün hücumlar etdik. Lakin “Şamaxı” yaxşı müdafiə olunurdu. Onlara qol vurmaq çətin idi.

- Hakimliyin nəticəyə nə dərəcədə təsiri oldu?

- Nəsə demək çətindir. Hər dəfə qaydalar çərçivəsində, yaxud qaydalar çərçivəsində olmayan qol vuranda VAR-a gedilir. Hər dəfə VAR, VAR, VAR - bilmirəm buna necə reaksiya verim.

- “Omoniya”dan alınan 0:6 hesablı məğlubiyyətdən sonra “Şamaxı” ilə matça psixoloji cəhətdən hazırlaşmaq nə dərəcədə çətin idi?

- Təbii ki, o cür məğubiyyətləri unutmaq çətindir. Oyunun ertəsi günü danışdıq. Baş məşqçimiz də öz fikirlərini söylədi. Komanda olaraq razılaşdıq ki, bu yenilgidən düzgün nəticə çıxarmalı və gələcəyə baxmalıyıq.

- Artıq Nikosiyadakı matçdan bir neçə gün keçib. İndi yəqin ki, daha düzgün fikir söyləmək mümkündür. Niyə həmin günü hesab arasındakı fərq bu dərəcədə böyük oldu?

- Belə oyunlar olur. Bəzən Dünya çempionatında belə, bu cür nəticələr qeydə alınır. Rəqibin günü idi. Bizdə isə əksinə, demək olar ki, heç nə alınmadı. Bu da yekunda nəticəyə öz təsirini göstərdi.

- “Omoniya” ilə cavab matçından gözləntiləriniz nədir?

- Başa düşürük ki, böyük ölçüdə cütün taleyini dəyişmək çətindir. Amma Bakıda qələbə qazanmaq istəyirik. Sonadək vuruşacağıq və əlimizdən gələni edəcəyik ki, öz meydanımızda qalib gələk.

İbrahim Cəfərov