Yuri Matias: “Eyni addımı “Neftçi”nin qapıçısı atsaydı, yenə də etiraz etməzdim”

“Neftçi”nin müdafiəçisi Yuri Matiasın Futbolxeber.az saytına müsahibəsi

- Azərbaycan Premyer Liqasının IV turunda “Neftçi” məğlubiyyətdən çətinliklə qaçdı. “Araz-Naxçıvan”la 1:1-lik bərabərliyi necə dəyərləndirirsiniz?

- Çətin oyun oldu. Komandanın ümumi durumu ürəyimiz istədiyimiz kimi deyil. Buna baxmayaraq, komanda şəklində xarakter göstərdik. Sona kimi yaxşı mübarizə apardıq və yekunda 1 xal qazandıq.

- Bu xal “Neftçi”yə nə verəcək?

- Bu 1 xal qarşıdakı matçlarda daha da çox xallar qazanmağımız üçün kömək olacaq.

- Onda belə çıxır ki, bu xalı “Neftçi” üçün qazanc saymaq olar?

- “Neftçi” adı varsa, 1 xal itki sayılır. Bizə sadəcə bir qələbə lazımdır ki, qarşıdakı oyunlara stimul olsun.

- Hər matçdan sonra “Neftçi” gələn tur mütləq qələbə qazanacaq” fikri səslənir, amma turlar bir-birini əvəz edir, qələbə isə yoxdur. Nə çatışmır?

- Çatışmayan yalnız qələbədir. Əminəm ki, bir qələbədən sonra hər şey başqa cür olacaq.

- “Neftçi” hesabı bərabərləşdirdiyi epizod rəqibin etirazı ilə qarşılandı. Həqiqətənmi o epizodda fair-play pozulmuşdu?

- Bu barədə danışmaq istəmirəm. Bizim işimiz futbol oynamaqdır.  

- Yaxşı, onda sual belə olsun - eyni vəziyyətdə sizin qapınıza qol vurulsaydı, buna reaksiyanız necə olardı?

- İnanın ki, eyni addımı “Neftçi”nin qapıçısı atsaydı, yenə də etiraz etməzdim.

İbrahim Cəfərov