Şahin Diniyevdən qələbə şərhi

“Düşünürəm ki, maraqlı oyun oldu. İstədiyim futbolu ala bildim. Komanda yaxşı oynadı. İlk dəqiqədən sona qədər dinamikanı saxladıq. Futbolçularıma təşəkkür edirəm. Yeni komandayıq. 11 nəfərdən 10-u ilk dəfədir ki, komandadadır. Zamanı tələsdirmək lazımdır. "Kəpəz" də yeni heyətə malikdir. Premyer Liqada qalmaq üçün mübarizə apara bilər. Hesab bizi aldatmasın. Onlar vuruşurdu, başabaş mübarizə aparırdı. İrəliyə baxmalıyıq. Bu oyunu unudub gələn oyuna köklənməliyik”.

Futbolxeber.az saytının məlumatına görə, bu sözləri “Səbail”in baş məşqçisi Şahin Diniyev Azərbaycan Premyer Liqasının IV turunda “Kəpəz”i 4:0 hesabı ilə məğlub etdikləri oyundan sonra deyib.

Təcrübəli mütəxəssis qeyd edib ki, yalnız üçüncü qoldan sonra komandasının qələbəsinə əmin olub: “2:0-da çətin idi. Bir qol buraxsaydıq, futbolçular psixoloji düşə bilərdilər. Ardında ikinci qol gələ bilərdi. Amma komandamızın oyunu gedirdi. Üçüncü qoldan sonra qələbənin uzaqda olmadığını hiss etdik”.

“Sizin üçün avrokuboklarda ən çox gözlənilməz hansı oldu, "Zirə", yoxsa "Qarabağ"ın məğlubiyyəti?” sualını Diniyev belə cavablandırıb: “Hər ikisi. İkisi də bizim üçün eyni komandadır. Hesab baxımından... "Qarabağ" oyun göstərdi. Oyuna baxmayan deyərdi ki, darmadağın oldu. Halbuki 3:0 əks tərəfdə olmalıydı. "Qarabağ" müdafiədən oynamadı. Öz futbolunu oynadı. Alqışlanası haldır. Oyun varsa, nəticə olacaq. "Qarabağ"a və "Zirə"yə görə üzüldüm. "Zirə"nin oyunu ilk dəqiqələrdən alınmadı. Oyun baxımından artırıblar. Sadəcə olmadı. Nəsə olmuşdu..."Zirə" öz səviyyəsindən aşağı çıxış etdi. Baş məşqçi daha yaxşı bilər. Bu hesaba layiq deyildilər. "Qarabağ"da isə hesab tərsinə ola bilərdi. Yuxu kimi idi. Ümid çoxdur”.

“Səbail”in çalışdırıcısı növbəti turda qarşılaşacaqları “Turan Tovuz”un baş məşqçisi Kurban Berdıyevi hələ “Terek”də baş məşqçi işlədiyi zamandan tanıdığını bildirib: “Berdıyev çox səviyyəli məşqçidir. Bəzən öz işçilərini gecə 3-4-ə qədər saxlayıb hər şeyi analiz edən, intizamı sevən biridir. Müdafiədə daha etibarlı, risk etməyi sevən məşqçidir. Sabahkı matçda "Qarabağ" kağız üzərində daha güclü görünür. Amma futboldur. Bilmək olmaz hansı heyətlə oynayacaqlar. Maraqlı oyun olacaq. Heç bir komandanın məğlubiyyətini istəmirəm. Mənim azarkeşlik etdiyim "Səbail"dir. Hər ikisinə uğurlar arzulayıram. "Qarabağ"ın hücumda, "Turan Tovuz"un müdafiədə...”

Diniyev hücumda yalnız Ayman Boalinin ümidinə qalmalarına belə münasibət bildirib: “Transferləri qışa qədər bitirmişik. Rotasiyalar edirik. Bugünkü matçda bəzən Suleyman Alluşu da hücumun mərkəzində oynadırdıq. Samir Abdullayev də var. Çox perspektivli oyunçudur”.