Adil Şükürov: “Ən asan şey qaçmaqdır, qaçmaqsa qorxaqlıqdır”

“Belə oyunlardan sonra danışmaq ağırdır. Daha yaxşı komanda görmək istəyirik. Amma komanda istədiklərimizi meydanda həyata keçirə bilmir. Vaxt lazımdır. O vaxtı qazana bilsək... Rəhbərliklə danışmışıq. İstəyirlər ki, komandamıza yeni oyunçular cəlb edək. Bu yöndə işlərimiz davam edir”.

Futbolxeber.az saytının məlumatına görə, bu sözləri “Kəpəz”in baş məşqçisi Adil Şükürov Azərbaycan Premyer Liqasının IV turunda “Səbail”ə 0:4 hesabı ilə uduzduqları oyundan sonra deyib.

Təcrübəli mütəxəssis vaxta ehtiyac duyduqlarını bildirib: “Sıfırdan yığılan komandaya ayyarım bəs etmir. Vaxt lazımdır. Hətta nəzərə alsaq ki, komandadakı oyunçuların hamısı gəncdir. Daha uzun müddət lazımdır. Komanda hazırlaşıb. Bu kollektiv gələcəkdə gücünü göstərəcək”.

O, 360 dəqiqə ərzində qol vura bilməmələrinin səbəbini belə izah edib: “Etdiyimiz səhvlərdən sonra qollar buraxırıq. Komanda az səhv etməlidir ki, qol buraxmasın”.

“Kəpəz”in çalışdırıcısı bezib komandadan getməsinə ehtimalına da toxunub: “Ən asan şey qaçmaqdır. Heç kimin qarşısından qaçan deyilik. Komandamızı da düzəldəcəyik. Bu komanda ilə liqada oynayacağıq. Qaçmaq qorxaqlıqdır. Top buraxırıq, amma çalışırıq ki, müdafiədə oturmayaq, hücum edək”.

A.Şükürov yeni transferlərlə bağlı bunları söyləyib: “Rəhbərlik özü də vəziyyəti görür. Bu vəziyyətdən çıxış yolu axtarırlar. Bir şeylər fikirləşib, tapacaqlarına inanıram”.

“Yayda Azərbaycanın iki klubu sizinlə maraqlanırdı, etmədiyiniz üçün peşmansız?” sualını o, belə cavablandırıb: “Qətiyyən. "Kəpəz" tarixi klubdur. "Kəpəz" tarixdə çox uğurlar qazanıb. Bu, mənə bəs edir”.