Ruan Renato: “Osiyek”lə oyunların hər dəqiqəsi bizim üçün vacibdir”

“Zirə”nin müdafiəçisi Ruan Renatonun Futbolxeber.az saytına müsahibəsi

- Azərbaycan Premyer Liqasına “Səbail” üzərində 4:1 hesablı qələbə ilə start verdiniz. Yəqin ki, bundan uğurlu başlanğıc ola bilməzdi...

- Bəli, oyuna çox gözəl başladıq. Yaratdığımız qol fürsətlərindən yaxşı istifadə etdik, 3 qol vurduq. İlk hissədə demək olar ki, hər şey alınırdı. Lakin fasilədən sonra intensivliyimiz bir qədər düşdü. Bununla belə, qələbə qazandıq və bu nəticədən məmnunam.

- Qeyd etdiniz ki, ikinci hissədə intensivliyiniz düşdü. Bu, nə ilə əlaqədar idi: 3:0-ın verdiyi arxayınçılıq idi, yoxsa yorğunluq sözünü dedi?

- “Səbail”in haqqını yeməyək, onlar fasilədən sonra geridönüş etdilər. Qol fürsətləri yaratmağa müvəffəq oldular. Hesab arasındakı fərqi azaltdılar da. Biz isə sona yaxın daha bir qol vurub matçın taleyini həll etdik.

- Ötənmövsümkü “Səbail”lə indiki arasında fərq böyükdür?

- Bilirəm ki, bu “Səbail” yeni formalaşmış komandadır. Gedənlər, eləcə də gələnlər var. Bu da onlar üçün effektiv olacaq. Hiss olunur ki, komandada yaxşı futbolçular cəmləşib. Düşünürəm ki, qarşıdakı matçlarda daha yaxşı çıxış edəcəklər. 

- “Zirə”ni “Səbail”lə matçda meydana kapitan kimi çıxardınız. Bu, ilk dəfə idi, yoxsa daha əvvəl olmuşdu?

- Ötən mövsüm də bir dəfə komandanı kapitan kimi meydana çıxarmışdım. Həmin vaxt da Qismət meydana çıxmadığı üçün sarğı mənə tapşırılmışdı.

- Qarşıdan UEFA Konfrans Liqasının III təsnifat mərhələsi gəlir. “Osiyek”lə səfər matçından gözləntiləriniz nədir?

- Pozitivəm. Bəli, səfərdə işimiz çox çətin olacaq. Amma hər şey rəqib meydanında bitmir. Buna görə də “Osiyek”lə oyunların hər dəqiqəsi bizim üçün vacibdir. Əlimizdən gələnin ən yaxşısını etməyə çalışacağıq.

- Şansları necə dəyərləndirirsiniz?

- Oyundan öncə şanslar həmişə bərabərdir, 50-nin 50-yə.

- Həm UEFA Konfrans Liqası, həm də Azərbaycan Premyer Liqası – iki cəhbədə mübarizə aparmaq nə dərəcədə çətin olacaq?

- Təbii ki, üç gündən bir meydana çıxmaq asan deyil. Xüsusən də səfər matçları zamanı yolda da vaxt itirirsən. Amma nəyisə dəyişmək mümkün deyil. Bütün gücümüzü toparlayıb hər matçda maksimum mübarizə aparmalıyıq.

İbrahim Cəfərov