Berdıyev: “Hədəflərimiz maksimumdur”

“Oyunun çətin olacağını ehtimal edirdik. "Neftçi" çox yaxşı komandadır. Bu oyun bizim çatışmayan cəhətlərimizi göstərdi. Hansı istiqamətlərdə çalışmalı olduğumuzu bildik. Amma ümumi olaraq futbolçularımın performansından razı qaldım”.

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev Azərbaycan Premyer Liqasının birinci turunda “Neftçi” ilə heç-heçə (0:0) oynadıqları görüşdən sonra deyib.

O, komandasının çatışmazlıqları haqda bunları söyləyib: “Hücum fazasında müəyyən məqamları qeyd edərdim. Uşaqlar necə oynamaq lazım olduğunu bilirlər. Yəqin ki, zamanla bunun öhdəsindən gələcəklər. Çox da böyük çatışmazlıq deyil”.

Berdıyev 1 xalla qane olmadığını qeyd edib: “Neftçi”" yaxşı komandadır. Amma biz daha çoxuna ümid edirdik. Maksimum hazırlaşmışdıq. Əgər hücumda oyunçular bacardığı və bildiyi kimi düzgün oynasaydı, hər şey başqa cür olardı”.

Təcrübəli mütəxəssis komandasının son 10 dəqiqədə yorğun görünməsinin təbii hal olduğunu bildirib: “"Neftçi"nin oyunçuları yoruldu, bizimkilər də. Yorğunluğun olması təbiidir”.

“Qarşılaşmadan əvvəl "Neftçi"ni təhlil edərkən hansı detalları nəzərə almışdız?” sualını “Turan Tovuz”un çalışdırıcısı belə cavablandırıb: “Hər komandanın çatışmazlıqları var. Bizim də, həmçinin. Bəzi anlar yaxşı alınırdı, əsasən də Ayxanın epizodlarında. Bəzi epizodlarda alınmadı. "Neftçi" haqda bilirik, amma buna şərh vermirik”.

Berdıyev tovuzlu azarkeşlərə təşəkkürünü çatdırıb: “Stadionda atmosfer yaxşı idi. Azarkeşlərimizə təşəkkür edirik ki, bizə dəstək olmaq üçün gəlmişdilər. Qazon hər iki komanda üçün eyni idi”.

O, "Turan Tovuz"dakı hədəfi haqda qısaca deyib: “Heyətimizdən asılı olmayaraq, hədəflərimiz maksimumdur”.