Ange Mutsinzi: “Zirə”də futbolla əlaqəli olan hər şey xoşagələndir, təqdirəlayiqdir”

“Zirə”nin müdafiəçisi Ange Mutsinzinin Futbolxeber.az saytına müsahibəsi

- UEFA Konfrans Liqasının II təsnifat mərhələsinin ilk oyununda “DAK-1904”ü məğlub etdiniz. 4:0 hesablı qələbəni necə şərh edərdiniz?

- Qalib gəldiyimiz üçün çox şadam. Nəticədən hər birimiz məmnunuq. 4:0 hesabı ilə qalib gəldik. Buna görə komandada hamı sevinir.

- Yəqin ki, hesab arasındakı fərqin bu qədər böyük olacağını gözləmirdiniz?

- Ola bilsin ki, “Şerif”ə məğlubiyyətdən sonra komandada bir qədər inamsızlıq var idi, belə hesabla qələbə qazanacağımızı gözləmirdik. Lakin oyunun təkrarına baxsaq görərik ki, 4 topla yanaşı, çoxsaylı qol epizodlarını da boşa verdik. Halbuki daha dəqiq oynasaydıq, hesab arasındakı fərq daha böyük ola bilərdi.

- “Şerif”ə məğlubiyyətdən sonra Konfrans Liqasının oyununa hazırlaşmaq psixoloji cəhətdən çətin olmadı?

- Mənə görə o qədər də çətin olmadı. “Şerif”lə cavab matçında bütün komanda əlindən gələni etdi. Yekunda penaltilərdə uduzmuşduq.

- Evdəki qələbə cavab matçı öncəsi komandada arxayınçılıq yaratmayacaq?

- Düşünmürəm ki, kimdəsə arxayınçılıq yaransın. Oyundan oyuna fokuslanmalı olduğumuzu bilirik. Cavab matçına hər kəs maksimum dərəcədə ciddi yanaşacaq. Heç bir arxayınçılıqdan söhbət gedə bilməz.

- “Zirə”nin yeni transferlərindənsiniz. Lakin meydan inamlı görünürsünüz və belə təəssürat yaranır ki, sanki illərdi komandadasınız...

- “Zirə”yə çox yaxşı qoşuldum. Artıq demək olar ki, adaptasiya prosesini keçmişəm. Yaxşı baş məşqçimiz var. Ümumiyyətlə, “Zirə”də futbolla əlaqəli olan hər şey xoşagələndir, təqdirəlayiqdir. Özümü evdəki kimi hiss edirəm.

- Bura gələnə qədər “Zirə”, Azərbaycan futbolu haqda hansı məlumatlara sahib idiniz?

- İlk növbədə onu deyim ki, burda olmaqdan məmnunan. Ötən il “Zirə” və “Qarabağ”ın oyunlarını izləyirdim. Ona görə də təklif gələndə çox düşünmədim, “Zirə”yə keçmək qərarına gəldim. İnanıram ki, Azərbaycanda uğur qazanacağam. Komandama həm avrokuboklarda, həm də ölkə çempionatında faydalı olmaq üçün əlimdən gələni edəcəyəm.

- Qeyd etdiniz ki, hələ ötən mövsüm “Zirə” və “Qarabağ”ın oyunlarını izləmisiniz. Bu maraq hardan idi?

- “Zirə”nin qapıçısı Tiaqo Silva ilə daha əvvəldən tanışıq. Onunla birgə 2022-2023 mövsümündə Portuqaliyanın “Trofonse” klubunda birgə çıxış etmişik. O vaxtdan əlaqəmiz var.

İbrahim CƏFƏROV