Melnik cavab oyunundan öncə “Fehervar”ı favorit görmür: “Bir qol gedişatı dəyişə bilər”

“Bizim üçün çox çətin oyun oldu”.

Futbolxeber.az saytına açıqlamasında bu sözləri “Fehervar”ın yarımmüdafiəçisi Boqdan Melnik UEFA Konfrans Liqasının II təsnifat mərhələsinin ilk oyununda “Sumqayıt”a 2:1 hesabı ilə qalib gəldikləri matç barədə danışarkən deyib.

Ukraynalı futbolçu “Sumqayıt”ın güclü rəqib olduğunu bildirib: "Əvvəldən də bilirdik ki, püşk bizim üçün uğurlu alınmayıb. Çünki qarşımızda yaxşı komanda var idi. “Sumqayıt” həqiqətən də güclü rəqibdir”.

27 yaşlı yarımmüdafiəçi rəqib haqda məlumatlı olduqlarını söyləyib: “Sumqayıt”ı yaxşı analiz etmişdik. Baş məşqçimiz də rəqib haqda bütün lazımi məlumatları bizə çatdırmışdı”.

İlk matçda Sumqayıtda qalib gəlmələrinə baxmayaraq, Boqdan Melnik hələlik mərhələ adlamadıqlarını düşünür: “Şanslar həmişə 50-nin 50-dir. Çünki vurulacaq bir qol oyunun gedişatını dəyişə bilər. Amma biz əlimizdən gələni edəcəyik ki, ikinci görüşdə də qələbə qazanmaqla mərhələ adlayaq”.

Fərəc ASLANOV