"Zirə" və "Neftçi"dən vacib qələbə

Azərbaycan Premyer Liqasında 35-ci turun oyunları davam edir.

Futbolxeber.az saytının məlumatına görə, bu gün turun daha 3 matçı keçirilib.

Avrokuboklar uğrunda mübarizə aparan 2-ci pillədəki "Sumqayıt" 5-ci yerdəki "Sabah"ın qonağı olub. Görüş meydan sahiblərinin qələbəsi ilə yekunlaşıb. Məğlubiyyətə baxmayaraq, "Sumqayıt"ın avrokubok şansı davam edir. Samir Abasovun komandası digər oyunların nəticəsindən asılı olmayaraq, son  turda qələbə qazansa, avrokuboklara vəsiqə qazanacaq. 

3-cü sırada yer alan "Neftçi" isə "Səbail"in qonağı olub. İkinci hissədə 14 dəqiqəyə 3 qol vuran flaqman vacib qələbə qazanıb. Bu qələbə sayəsində son tur öncəsi "Neftçi" ikinci pilləyə yüksəlib. Lakin bu, "ağ-qaralar"ın avrokuboklara vəsiqə qazanması anlamına gəlmir. İstəyinə çatmaq üçün Bojoviçin komandası son turda "Sabah"a uduzmamalıdı. 

4-cü pillədəki "Zirə" Tovuzda "Kəpəz"lə üz-üzə gəlib. 3 xalı tək qolla qazanan Rəşad Sadıqovun komandası avrokuboklar yolunda mühüm addım atıb.

Qeyd edək ki, dünən start götürən tura sabah keçiriləcək 1 oyunla yekun vurulacaq.

Azərbaycan Premyer Liqası

XXXV tur

18 may (şənbə)

"Sabah" - "Sumqayıt" - 2:0

Qollar: Murad Xaçayev, 35-avtoqol, Anatoli Nuriyev, 90

Hakimlər: İnqilab Məmmədov, Namiq Hüseynov, Rahil Ramazanov, Fərid Hacıyev

“Bank Respublika Arena”

"Səbail" - "Neftçi" - 0:3

Qollar: Brayan Moreno, 69, Ata Caber, 79, Qara Qarayev, 83

Hakimlər: Tural Qurbanov, Rəhman İmami, Zöhrab Abbasov, Nicat İsmayıllı

“ASCO Arena”

"Kəpəz" - "Zirə" - 0:1

Qol: Salifu Suma, 49

Hakimlər: Rəvan Həmzəzadə, Kamran Bayramov, Cəmil Quliyev, Kamal Umudlu

Tovuz şəhər stadionu

19 may (bazar)

16:00. “Qəbələ” - “Araz-Naxçıvan”

17 may (cümə)

“Qarabağ” - “Turan Tovuz” - 4:3

Bombardirlər: Olavio Juninyo ("Qarabağ") - 18 qol, Aleksandr Ramalinqom ("Səbail") - 15 qol, Yassin Benzia ("Qarabağ"), Nəriman Axundzadə ("Qarabağ") - 12 qol