"Bakı"dan 0:15-in gizlədilməsinə rəsmi münasibət (ÖZƏL)

Hazırda Fransada olan "Bakı"nın U-15 komandası "Lans"lı həmyaşıdlarına qarşı keçirdiyi yoxlama oyununda 0:15 hesabı ilə uduzub. Klubun rəsmi saytında tərəflər arasında matçın baş tutduğu barədə xəbər yerləşdirilsə də, oyunun nəticəsi yer almamışdı. Məsələ ilə bağlı Futbolxeber.az saytı "Bakı"nın mətbuat xidmətinin əməkdaşı İsgəndər İsgəndərova müraciət etdi. Əməkdaşımızla "Bakı" rəsmisi arasında olan dialoqu olduğu kimi təqdim edirik:

- İsgəndər bəy salam. "Bakı"nın "Lans"a 0:15 hesabı ilə uduzduğu doğrudur?

- Bəli.

- Bəs nəyə görə saytda nəticə qeyd olunmayıb?

- Hesab elədik ki uşaqlara pis təsir edər.

- Qərarı siz qəbul etdiz, yoxsa rəhbərlik belə məsləhət bildi?

- Mən belə fikirləşdim. Bir də ki bu yoldaşlıq oyunudur və nəticə önəmli deyil.

- Siz nəticəni gizlətsəz də, onsuz da ictimaiyyət bundan xəbər tutacaqdı. Bəli, nəticə önəm daşımır. Amma siz bunu etməklə uşaqları düşünsəniz də, özünüzü zərbə altına qoydunuz...

- Bu sizin fikrinizdir, mən belə düşünmürəm. Bir də ki gizlətmək deyəndə, siz nə vaxt zəng etdiz biz sizə nəticəni demədik?

- İsgəndər bəy, bu məsələ ilə bağlı biz sizə zəng vurmalı deyilik. Çünki xəbər saytda yerləşdirilirsə, nəticə mütləq qeyd olunmalıdır

- Gələn dəfə nəzərə alarıq.

Elman MƏHƏRRƏMOV