Arif Əsədov: "Belə şey olmayıb, ola da bilməz"

2 gün əvvəl Futbolxeber.az saytında U-19 millimizin baş məşqçisi Arif Əsədovun AFFA-nın baş katibi Elxan Məmmədovun təkidi ilə 2 futbolçunu yığmadan uzaqlaşdırdığı barədə xəbər vermişdik. Bu məlumatı bizə çatdıran mənbə informasiyanın doğruluğuna əmin olduğunu söyləmişdi. Xəbəri dəqiqləşdirmək üçün həmin 2 futbolçudan biri olan "Qarabağ"ın əvəzedici heyətinin kapitanı Nurlan Əhmədovla əlaqə saxlasaq da, gənc müdafiəçi belə bir hal baş vermədiyini qeyd etmişdi. N.Əhmədovun açıqlamasından sonra hadisədə adı çəkilən Arif Əsədovla əlaqə saxlamağa ehtiyac duymadıq.

Əvəzində Arif Əsədov bu gün Futbolxeber.az saytı ilə əlaqə saxlayaraq, hadisəni təkzib etdi. Arif Əsədovun açıqlamasını olduğu kimi təqdim edirik: "Belə şey olmayıb, ola da bilməz. Mən heç vaxt sifarişlə futbolçu götürmürəm. Çünki komandanın baş məşqçisi mənəm və nəticəyə də mən cavabdehəm. Bəli, Nurlanı 1 dəfə milliyə çağırmışam. Seleksiya xarakterli toplanışa. Ancaq həmin vaxt gördüm ki onun kimi Azərbaycanda 50 futbolçu var. Mənim Nurlanın əvəzinə dəvət etdiyim futbolçular da ondan güclüdürlər. Buna əmin ola bilərsiniz".