Millimizin hücumçusu: "Biz AFFA rəhbərliyini sevindirdik, onlar da bizi" (Müsahibə)

"Sumqayıt"ın və 21 yaşadək futbolçulardan ibarət milli komandamızın hücumçusu Nurlan Novruzov Futbolxeber.az saytına müsahibə verib.

- İlk olaraq "Rəvan"a qarşı keçirilən son oyun (1:1) barədə fikirlərini bilmək istərdim.

- "Rəvan"la oyuna 3 xal üçün çıxmışdıq. Lakin səfərdən 1 xalla qayıtdıq. Qısaca onu deyim ki, bu oyunda 2 xal itirdik.

- Deməli, sən də Aqil Məmmədovun fikri ilə razısan ki, həmin gün "Sumqayıt" rəqibdən daha üstün idi.

- Həqiqətən də belə idi. Həm ilk, həm də ikinci hissədə rəqibdən üstün oynadıq. Xeyli qol imkanlarımız olsa da, yararlana bilmədik. "Rəvan"ın bəxti gətirdi.

- Oyuna sonradan qoşulmağının səbəbi nə idi: baş məşqçinin qərarı belə oldu, yoxsa zədən var idi?

- Zədəylə bağlı heç bir problemim yoxdu. Eləcə də başqa hər hansı bir səbəb. Sadəcə olaraq, məşqçinin qərarı belə idi.

- 13 turdan sonra "Sumqayıt" "Rəvan"la birgə aşkar autsayderdi və axırıncı yerdə gedir. Uğursuzluğun səbəbini nədə görürsən?

- "Sumqayıt" həm gənc komandadı, həm də 2-3 futbolçudan başqa hamı təzə yığılıb. Bir az zamana ehtiyac var. İnanıram ki qarşıdakı oyunlarda vəziyyət dəyişəcək.

- Qış fasiləsinə elə də çox qalmayıb. Gələcəyinlə bağlı hansı fikirdəsən: "Bakı"ya qayıdacaqsan, yoxsa elə "Sumqayıt"da qalacaqsan?

- Hələ ki bununla bağlı fikirləşmirəm. Hazırda "Sumqayıt"dayam və bütün fikrimi bu komandanın uğur qazanmasına yönəltmişəm.

- Hazırda U-21-in düşərgəsindəsən. Makedoniyaya qarşı keçiriləcək oyunla bağlı nə deyə bilərsən?

- Makedoniya ilə Bakıda qarşılaşmışıq. Rəqib güclü olsa da, biz də zəif deyilik. Bura 3 xal üçün gəlmişik. Komandamıza çox inanıram. Ümid edirəm ki, buradan qələbə ilə ayrıla bilərik. Səfərdən vətənə qələbə ilə qayıtmağın ayrı ləzzəti var.

- Makedoniyanı Bakıda məğlub edə bilməsək də, onlar sizin səfərdə məğlub etdiyiniz Norveçə uduzublar. Bu amil komandamızı arxayınlaşdırmır ki?

- Əlbəttə ki yox. Bu futboldu. Hər şey baş verə bilər. Hamımız yaxşı dərk edirik ki qrupda zəif rəqib yoxdur.

- Komandamiz qrupdakı bütün rəqiblərə qarşı oynayıb. Yəni Portuqaliya, İsrail, Makedoniya və Norveçin gücünə bələdsiz. Necə düşünürsən, komandamızın gücü bu qrupda neçənci yeri tutmağa imkan verir?

- Məncə, qrupda 2-3-cü yerlərdən birini tutacağıq. Bizim də əsas məqsədimiz qrupda ikinci yeri tutmaqdı.

- İsraillə oyundan sonra deyilmişdi ki yenilgiyə görə cərimələnəcəksiz. Məsələ nə yerdə qaldı?

- Bizim bu yenilgini tez unutdurmağımız rəhbərliyi sevindirdi. Onlar da bizi sevindirdilər.

- Yəni İsraillə oyuna görə cərimələnmədiniz?

- Bu haqda xəbərim yoxdu. Həmin oyunda "18-lik"də yer almamışdım.

Elman MƏHƏRRƏMOV