Pedro Nuno: “Növbəti 7 matçda bu cür səhvlərə yol verməməliyik”

“Oyun gərgin şəraitdə keçdi. Uduzsaq da, mübarizəmizi davam etdirəcəyik”.

Futbolxeber.az saytına müsahibəsində bu sözləri “Səbail”in yarımmüdafiəçisi Pedro Nuno Azərbaycan Premyer Liqasının 29-cu turunda “Qarabağ”a 2:4 hesabı ilə uduzduqları oyun barədə danışarkən deyib.

Portuqaliyalı rəqibin möhtəşəm oyun sərgilədiyini bildirib: “Çətin oldu, rəqib Azərbaycan çempionu "Qarabağ"dır. Onlar çempion olmaqlarına baxmayaraq, möhtəşəm oyun sərgilədilər. Biz də sübut etdik ki, belə rəqibə qarşı oynamaq olar. Növbəti matçlarda da inamlı çıxışımızı davam etdirməliyik”.

O, komanda şəklində səhvlərə yol verdiklərini söyləyib: “Rəqibin gücü hər şeydən xəbər verir. Amma buraxdığımız qollarda komanda şəklində yol verdiyimiz səhvlər də oldu. Biz növbəti 7 matçda bu cür səhvlərə yol verməməliyik. Öz üzərimizdə çalışmalıyıq. Ən yaxşısını etməyi qarşımıza məqsəd qoymuşuq”.

29 yaşlı yarımmüdafiəçi hədəflərinin avrokuboklara vəsiqə qazanmaq olduğunu vurğulayıb: “Yekunda avrokuboklara vəsiqə verən pillədə çempionatı yekunlaşdırmaq istəyirik. Premyer Liqanı ilk 3-lükdə başa vurmağı hədəfləmişik. Bilirik ki, çətin olacaq. Amma qarşıdakı 7 oyuna yaxşı köklənib bunu reallaşdırmalıyıq”.

P.Nuno növbəti turda "Kəpəz"a qarşı keçirəcəkləri matça da toxunub: “Bu komanda son  turlar xoş təsir bağışlayır. Amma biz mütləq qələbə qazanmalı və aktivimizə 3 xalı yazdırmalıyıq”.

Azad NURİYEV