“Kəpəz”in kapitanı: “Hədəfimiz 9-cu yox, daha yüksək yerlərdir”

“Qarabağ”la görüşdə ağır məğlubiyyət aldıq. O oyundan sonra psixoloji cəhətdən çətin vəziyyətdə idik. Lakin məşqçilər korpusu bizi yaxşı hazırlaşdırdılar”.

Futbolxeber.az saytına müsahibəsində bu sözləri “Kəpəz”in kapitanı Yeqor Xvalko deyib.

O, Azərbaycan Premyer Liqasının 29-cu turunda “Araz-Naxçıvan” üzərində qazanılan 2:1 hesablı qələbəni belə şərh edib: “İstədiyimizə nail olduq, qələbə qazandıq. Düzdür, ilk hissədə zəif oynadıq. Qola qədər rəqibdən geri qalırdıq. Çoxlu səhvlərimiz var idi. İkinci hissədə toparlandıq, məşqçilər də öz tapşırıqlarını verdilər. Nəticə layiqlidir”.

Hazırda sonuncu pillədə qərarlaşan “Qəbələ”ni 14 xal qabaqlarına baxmayaraq, belaruslu müdafiəçi hələ Premyer Liqada qalmaq vəzifəsinin öhdəsindən gəlmədiklərini söyləyib: “Liqada qalmağımız riyazi cəhətdən həll olanda bu barədə danışmaq mümkündür. Hələ ki qarşıda 7 tur var. Ola bilər ki, biz qalan oyunların hamısında uduzaq, “Qəbələ” isə qələbə qazansın. Yəni hər şey mümkündür. Hazırda 14 xal öndə olmağımız oyunlara nisbətən sakit hazırlaşmağa imkan verir”.

Xvalko qeyd edib ki, məqsədləri turnir cədvəlində daha da irəli getməkdir: “1-2 matç istisna olmaqla, yeni ildən yaxşı çıxış edirik. Hədəfimiz 9-cu yox, daha yüksək yerlərdir. Hazırda “Araz-Naxçıvan”dan cəmi 2 xal geri qalırıq. İndiki halda 8-ci pilləyə yüksəlməyi hədəfləyirik. Buna nail olsaq, sonra 7-ci yer üçün oynayacağıq”.

27 yaşlı futbolçu növbəti turda “Səbail”ə qarşı keçirəcəkləri matçdan da söz açıb: “Səbail”lə görüşdə də qələbə üçün meydana çıxacağıq. Çalışacağıq ki, öz oyunumuzu göstərək. Rəqib avrokuboklar uğrunda mübarizə aparır. Bu da onlar üzərində təzyiq yaradır. Odur ki, bizi maraqlı oyun gözləyir”.

Fərəc ASLANOV