Nir Bardea: “Növbəti oyunlar “Səbail” üçün həlledici olacaq”

“Oyun barədə nə deyə bilərəm ki? Məğlub olduq, bununla belə, daha çox öz üzərimizdə çalışmalıyıq”.

Futbolxeber.az saytına müsahibəsində bu sözləri “Səbail”in müdafiəçisi Nir Bardea Azərbaycan Premyer Liqasının 29-cu turunda “Qarabağ”a 2:4 hesabı ilə uduzduqları oyun barədə danışarkən deyib.

İsrailli futbolçu qarşıdakı turlarda ardıcıl xallar qazanmalı olduqlarını bildirib: “Növbəti oyunlar komandamız üçün həlledici xarakter daşıyacaq. Ona görə də ardıcıl xallar qazanmalıyıq. Bəlli bir hədəfimiz var. Hazırda bundan uzaq olsaq da, davamlı olaraq məqsədimiz uğrunda mübarizə aparmalıyıq”.

Bardea rəqibin baxımlı qollar vurduğunu söyləyib: “Qarabağ”ın cərimə zərbəsindən hesabı bərabərləşdirdiyi epizod qarşısıalınmaz idi. Düşünürəm ki, hücumların qarşısını almaqda çətinlik çəkirdik. Amma oyun ərzində inamlı mübarizə apardıq. 2-ci qolu buraxdıqdan sonra matça fokuslanmaq bir qədər ağır oldu. Əlimizdən gələni etməyə çalışdıq”.

28 yaşlı futbolçu bildirib ki, turnir cədvəlində 7-ci yerə ensələr də, hədəfləri dəyişməyib: “Avrokuboklara vəsiqə verən yerlər uğrunda mübarizəmizi davam etdiririk. Növbəti oyunda mütləq qələbə qazanmalıyıq ki, bu mübarizədən geri qalmayaq. Hər kəs mövcud situasiyanı başa düşür. Ümid edirəm ki, yekunda bunu reallaşdıra biləcəyik. Medal qazanmaq üçün döyüşürük. Premyer Liqanı avrokuboklara vəsiqə verən yerlərdən birini tutaraq başa vurmaq istəyirik. Əminəm ki, bu yerlər üçün son tura qədər döyüşəcəyik. Komandada hər kəs bu pillədə olmaq istəyir”.

Azad NURİYEV