Ayxan Abbasovdan qələbə şərhi: “Futbolçularıma inanırdım”

"Turan Tovuz"un baş məşqçisi Ayxan Abbasov Azərbaycan Premyer Liqasının 29-cu turunda "Sabah" üzərində qazanılan 2:0 hesablı qələbəni şərh edib.

Futbolxeber.az saytının məlumatına görə, təcrübəli mütəxəssis paytaxt klubuna evdə ilk dəfə qalib gəldiklərini xatırladıb:

"Vacib oyun idi. Qələbə qazanmaq istəyirdik. "Sabah"a heç vaxt evdə qalib gəlməmişdik. Futbolçularıma inanırdım. Bu mövsüm evdə yaxşı oynayırıq. Fürsətlərdən yaxşı istifadə etdik. Qoldan sonra da şanslarımız oldu. İtkilərimiz çoxdur. Bu gün də Aleks Serrano cazalı duruma düşdü. Nəsə fikirləşəcəyik".

O, "Qəbələ" ilə matçda mövqe dəyişiklikləri edə biləcəyini söyləyib: “Bu il orta xətdə oyunçularımız zədələnir. Xəyal Nəcəfovu məcburiyyətdən dayaq yarımüdafiəçisi oynadırıq. Mövqe dəyişiklikləri edə bilərik. Bu gün Miller də zədələndi. Çempionatın sonuna yaxın belə hallar olur. Buna hazır olmaq lazımdır”.

O, təzyiq altında olmadıqlarını qeyd edib: “Gələcəkdə iddialı olmaq, avrokuboklar uğrunda oynamaq istəyirik. Klub olaraq inkişaf edirik. Əgər şansımız varsa, bundan istifadə etmək istəyərik. Bu il bəzi komandalar çempionata zəif başladılar. Turnir cədvəlində bunun da rolu var. Gələcəyi fikirləşirik”.

“Heyəti qorumaq çətin olmayacaq?” sualını A.Abbasov belə cavablandırıb: “Bu il bizim üçün daha asan olacaq. Çünki əksər oyunçuların müqaviləsi var. Bununla yanaşı, yeni futbolçular da cəlb olunmalıdır”.

O, Roderik Millerin ayağı burxulduğunu söyləyib: “Ayxan Quseynovda da eyni zədədir”.